Në orët e para të mëngjesit të 24 shkurtit, Shqipëria dhe SHBA-ja, dy vendet bashkëpenëmbajtëse të çështjes së Ukrainës në Këshillin e Sigurimit të OKB-së, formuluan një rezolutë, e cila dënon sulmin rus ndaj Ukrainës dhe e quan një “agresion ndaj Kartës së OKB-së dhe paqes botërore”.
Dokumenti i nënshkruar nga Ambasadori i Shqipërisë në OKB, Ferit Hoxha dhe homologia e tij amerikane Linda Thomas-Greenfield, ka për qëllim parësor dënimin e sulmit dhe ndalimin e mëtejshëm të tij nga ana e Rusisë në dëm të Kievit.
Gjithashtu, në të përfshihet edhe një pikë për ndihma humanitare për Kievin, si pasojë e një krize refugjatësh, të cilën Rusia e ka krijuar me agresionin.
Kjo çështje, edhe në bazë të rezolutës, mbart një peshë dhe rëndësi ndërkombëtare, pasi cenon paqen dhe sigurinë botërore.
“Si pjesëtarë të Kombeve të Bashkuara, duhet të zgjedhim”, shtrohet çështja në të. “Ose do t’i qëndrojmë Kartës së OKB-së, në mbrojtje të sovranitetit të Ukrainës, integritetit territorial të saj dhe pavarësisë, ose do t’i lejojmë Rusisë të na çojë pas në kohë, në epokën e imperializmit, kolonizimit dhe perandorive”.
The 🇷🇺 invasion of 🇺🇦 is an assault on UN Charter & world peace.@AlMissionUN & @USUN have tabled a resolution in #UNSC to mobilize the world against aggression & in support of 🇺🇦 independence.
All peace-loving nations must make their voice heard and join the co-sponsors list! pic.twitter.com/F5aviMAdfs
— Albania in UN (@AlMissionUN) February 25, 2022
Në dokumentin në fjalë theksohet se duke qenë të bashkuar, kësaj vuajtje mund t’i jepet fund, jo vetëm thjeshtë për njerëzit në Ukrainë, por për gjithë botën që zgjedh paqen dhe diplomacinë mbi luftën dhe agresionin.
“Si parim, ky dokument, nëse nënshkruhet nga vendet e tjera, është një votë pro botës së lirë”, përmbyllet rezoluta.
Kjo lëvizje e fundit e bashkëpenëmbajtësve të çështjes ukrainase në Këshillin e Sigurimit, vjen pikërisht ndërkohë që Kievi, po zgjohej nën bombardimet ruse.
Presidenti i Rusisë, Vladimir Putin, urdhëroi një “operacion ushtarak” në Ukrainë, në orën 5:55 të mëngjesit të 24 shkurtit, 2022. Disa minuta më vonë pasuan granatimet e para.
Më 21 shkurt, presidenti rus, Vladimir Putin mori vendimin për njohjen e rajoneve separatiste të Ukrainës, Donjeck dhe Luhansk, si shtete të pavarura dhe urdhëroi vendosjen e forcave ruse në ato territore.
Perëndimi e ka dënuar fuqishëm këtë veprim, duke e cilësuar si uvertyrë për pushtim të plotë.
Top Channel
