I akuzuar për shpërdorim detyre/ Kalon për gjykim çështja ndaj ish kryebashkiakut të Himarës, Jorgo Goro 15/11 11:02
Kryetari i Partisë Demokratike, Lulzim Basha këtë të enjte i është përgjigjur ultimatumit të Komisionit të Rithemelimit të PD-së që i bënte me dije se deri me datë 5 janar duhet të dorëzojë zyrën e kryetarit.
Në një deklaratë për mediat, Basha tha se shqiptarët nuk e kanë mendjen te karriget, por vetëm ata persona që janë futur në këtë betejë për karriget, ndërsa theksoi më tutje se PD i ka marrë vendimet e veta dhe atyre do t’u qëndrojë deri në fund.
“PD i ka marrë vendimet e veta dhe do t’u qëndrojë deri në fund. Kuvendi i 18 dhjetorit është zgjedhje e të ardhmes dhe cdo vendim do jetë në funksion të njerëzve dhe halleve të tyre, nuk na plas për karriget e atyre që paskan qenë këtu vetëm për karriget”, tha kryedemokrati.
Njëzetë e nëntë anëtarët e Komisionit të Rithemelimit të enjten i kërkuan Lulzim Bashës të lirojë ambientet e punës së kryetarit të partisë, duke i vendosur si afat përfundimtar datën 5 janar ose përndryshe, sipas tyre, anëtarësia e PD-së do të jetë e detyruar të shndërrohet në përmbarues të këtij vendimi politik.
Një nga anëtarët e këtij komisioni, Belind Këlliçi, theksoi se shkresa do i dërgohet përmes postës Lulzim Bashës, ndërsa do vihen në dijeni edhe trupi diplomatik i akredituar në Tiranë.
Ai tha se Kuvendi i Partisë Demokratike me datë 11 dhjetor vendosi shkarkimin e Lulzim Bashës si kryetar partie, por shtoi se pavarësisht nenit 43 të Statutit, kjo vendimmarrje mund të ishte vetëm e Kuvendit, ky i fundit, sipas tij, në respekt të mijëra demokratëve vendosi të ratifikonte vendimmarrjen përmes një referendumi të mbajtur, sipas parimit një anëtar një votë.
“Rezultati i tij përfundimtar sanksionon që 43 mijë demokratë kanë vendosur në favor të vendimit të Kuvendit Kombëtar dhe shkarkimin tuaj”, tha Këlliçi.
Ai, deklaroi se Komisioni i Rithemelimit të PD me anë të këtij komunikimi zyrtar e fton të njihet me vullnetin e PD-së dhe organeve më të larta.
“Kërkohet nga ana juaj që të merrni të gjitha masat përkatëse për t’a jetësuar vullnetin e qartë të demokratëve, të shprehur nëpërmjet vendimit të Kuvendit dhe referendumit si mekanizëm i demokracisë së drejtpërdrejtë, duke liruar ambientet e punës së Kryetarit të Partisë, si dhe duke kryer menjëherë dorëzimet përkatëse te Komisioni i Përkohshëm i Rithemelimit të PDSH, deri më datë 05/01/2022”, tha Këlliçi.
Sipas tij, refuzimi i vendimit të Kuvendit Kombëtar dhe vullnetit të 43 mijë anëtarëve që ratifikuan vendimin e shkarkimit, do detyrojë anëtarësinë e PD-së të shndërrohet në pëmbaruesin e këtij vendimi politik.
Kuvendi i thirrur nga ish kryeministri Sali Berisha dhe mbështetësit e tij votoi më 11 dhjetor për shkarkimin e Kryetarit të Partisë Demokratike, Lulzim Basha, ndërsa një javë më vonë gjithçka u vulos sipas parimit një anëtar një votë.
Sipas iniciuesve të këtij referendumi, për largimin e Bashës nga kreu i PD-së votuan 43,385 anëtarë të kësaj partie.
Komision për Rithemelimin e PD-së i përbërë nga 29 anëtarë, përfshirë z.Berisha, pretendon se do të jetë institucioni Kolegjial që do të drejtojë partinë deri në Kuvendin e ardhshëm më 22 Mars 2022, ku do të zgjidhen strukturat e reja drejtuese.
Top Channel
