Kërcënimet e rreme në TikTok mbyllin disa shkolla në SHBA

Policia dhe institucionet e tjera të zbatimit të ligjit nuk besojnë se kërcënimet janë të vërteta, pasi nuk kanë arritur të gjejnë as një video ku flitet për një fakt të tillë, por autoritetet lokale në SHBA kanë preferuar të pezullojnë mësimin me qëllim shmangien e rrezikut.

Në disa zona, shkollat do të jenë të hapura rregullisht, por nën kujdesin e rreptë të forcave policore.

Rreziku nga të shtënat me armë merret shumë seriozisht në Shtetet e Bashkuara të Amerikës, ku vetëm gjatë vitit të kaluar ka pasur rreth 150 incidente të lidhura me përdorimin e armëve të zjarrit që kanë sjellë vdekjen e 32 personave dhe plagosjen e 100 të tjerëve.

Megjithatë, për momentin, asnjë element nuk është shfaqur deri më tani për të besuar se kërcënimet që hamendësohet se qarkulluan në TikTok janë të vërteta.

Hipoteza është se gjatë kësaj jave në rrjetet sociale qarkulluan disa video që përmendnin një rrezik të tillë, por pa dhënë prova apo referenca se ku mund të ndodhnin.

Përdoruesit e tjerë, pasi i kishin vënë re ato, kanë sinjalizuar rrezikun duke përmendur dhe shpërndarë më shumë përmbajtje të tjera ku flitej për një rrezik që mund të vijë nga sulmet në shkolla me datë 17 dhjetor.

Drejtuesit e shkollave, pas shqetësimeve të prindërve, dërguan disa email-e ku sqarohej se nuk është gjetur asnjë e dhënë e besueshme.

Në Baltimore dhe Maryland, drejtuesit e shkollave publikuan një mesazh në Twitter, ku bënin me dije se “forcat e policisë kanë hetuar këtë kërcënim, duke arritur në përfundimin se një kërcënim i tillë e ka origjinën në Arizona dhe mbi të gjitha nuk është i besueshëm”.

(1/3) ALERT: BCPS has been made aware of an anonymous threat posted on TikTok targeting all schools in the United States. The post alleges that there are planned school shootings that will take place on Friday, December 17.

— Baltimore County Public Schools (@BaltCoPS) December 16, 2021

Pas shqetësimeve të shumta të qytetarëve, rrjeti social TikTok bëri një deklaratë të shkurtër ku konfirmonte se nuk kishte gjetur asnjë provë ku mund të flitej për kërcënime të këtij lloji.

We handle even rumored threats with utmost seriousness, which is why we’re working with law enforcement to look into warnings about potential violence at schools even though we have not found evidence of such threats originating or spreading via TikTok.

— TikTokComms (@TikTokComms) December 16, 2021

Kompania tha se vazhdon komunikimin me policinë dhe për më tepër nuk nënvlerëson asnjë paralajmërim për dhunë.

Nuk është hera e parë që mesazhe të tilla janë vështirë për t’u verifikuar dhe për më tepër që pretendohet se kanë qarkulluar në rrjetet sociale. Në muajin tetor të vitit të kaluar, sfida për të “goditur një mësues” u përhap masivisht në mesin e studentëve, por që rezultoi të ishte false.

Më herët, një sfidë tjetër kishte të bënte me vjedhjen e disa objekteve në pronësi të shkollave, por edhe në këtë rast pati vetëm disa incidente të izoluara, ndërsa shumica e nxënësve që i ishin bashkuar kësaj sfide pretenduan se kishin vjedhur diçka të vogël sa për të xhiruar një video dhe për të fituar një farë popullariteti në TikTok.

Top Channel