Sokratis Famellos zgjidhet lideri i ri i Syriza-s/ Do përballet me sfidën e unitetit dhe rimëkëmbjes 25/11 11:26
Grupe që kundërshtojnë vaksinën e koronavirusit (COVID-19) organizuan protesta në kryeqytetet e provincave në Australi, të cilat u shoqëruan me kundërprotesta nga turma të tjera që pohuan se këta grupe gjenden nën kontrollin e racistëve të ekstremit të djathtë, raporton Anadolu Agency (AA).
Në demonstratat që u zhvilluan në qytetet Melburn, Sidnei, Brisbane, Perth, Adelaide dhe Hobart me pjesëmarrjen e dhjetëra mijëra australianëve, grupet kundër kufizimeve anti-COVID-19 dhe vaksinimit të detyrueshëm dolën në rrugë nën moton “liri”, kurse kundërshtarët e këtyre grupeve me moton “kundër racizmit”.
Ekipet e policisë, të cilat morën masa të forta sigurie në demonstrata me pjesëmarrje të madhe, i penguan protestuesit kundërshtarë të takoheshin për të shmangur tensionet.
Demonstratat në Melburn, qytet i cili u mbyll gjashtë herë për 267 ditë në data të ndryshme për shkak të pandemisë, u zhvilluan me pjesëmarrje intensive nga të dyja palët.
– Protestuesit duan që projektligji në Victoria të tërhiqet
Qeveria e Victoria-s ka përgatitur një projektligj që parashikon transferimin e kompetencave të marrjes të vendimeve si ora policore dhe qëndrimi në shtëpi, në rast të pandemive të mundshme në të ardhmen, nga Nënsekretari Shtetëror i Shëndetësisë te ministri i Shëndetësisë dhe kryeministrit.
Partitë opozitare dhe grupet mbështetëse, duke pretenduar se projektligji nënkupton “grusht ndaj lirive në shtet”, kërkojnë tërheqjen e projektligjit të paraqitur në parlament.
Duke bërtitur parulla kundër kryeministrit të Victoria-s Daniel Andrews, i cili përgatiti projektligjin, protestuesit në Melburn mbanin pankarta që kërkonin shkarkimin e tij.
“Ne jemi këtu për të shpëtuar Victoria-n nga Daniel Andrews”, tha për AA Dusty Starr, një nga protestuesit.
Sinem Özerkan, një nga turqit australianë që mori pjesë në protestën kundër vaksinimit, tha: “Sot jam këtu vetëm për lirinë tonë. Unë kundërshtoj vaksinimin e detyrueshëm për të ardhmen e fëmijëve tanë dhe të gjithëve”.
Kryeministri Andrews pohoi se qarqet neonaziste ndikuan në këto protesta, pasi gjatë demonstratës u improvizua ekzekutimi i tij në trekëmbëshin e ngritur përpara parlamentit të Victoria-s në shenjë proteste kundër projektligjit.
Pasi Andrews deklaroi se “ekstremistët” kishin depërtuar në protestën kundër ligjit të pandemisë, një person, i cili u raportua se ishte neonazist dhe u ndalua me akuzën për thirrje për “atentat” ndaj Andrews, do të dalë në gjykatë në ditët në vijim./AA/
Top Channel
