Kryeministri Edi Rama, ka zhvilluar një konferencë të përbashkët me kryeministrin e Republikës arabe të Egjiptit, Mostafa Madbouly, të cilin e falenderoi për mikpritjen dhe bashkëpunimin.
Gjatë konferencës, Rama tha se ka marrë premtimin për të vendosur linjën ajrore të drejtpërdrejtë Kajro-Tiranë.
Sipas tij, kjo do të ndihmojë shqiptarët që bëjnë pushimet në Egjipt si dhe theksoi se nga pala shqiptare, linja nuk do të jetë kurrë bosh.
Edi Rama: Duke ardhur në ditët e sotme, na takon ne të përpiqemi e të ndërtojmë për më mirë dhe të forcojmë marrëdhëniet tona. Dua t’ju falenderoj për disponibilitetin për të ecur përpara duke bërë bashkë një komisioni të përbashkët, duke identifikuar fushat tona të bashkëpunimit ku duhet të nxitim për të bërë më shumë.
Shifrat e tregtisë janë shumë modeste, ndërkohë që potenciali është i prnaishëm kështu që marr me vete premtimin për të parë personalisht, për tu kujdesur, për të vendosur linjën e drejtpërdrejtë mes Kajros dhe Tiranës. Nuk e di nga pala egjiptiane, por nga pala shqiptare ju siguroj se nuk do të jetë kurrë bosh. Kjo linjë ajrore nuk do të jetë barrë për kompaninë. Krejt e kundërta, do të ndihmojë shumë shqiptarë që dëshirojnë të vizitojnë, duan të bëjnë pushimet këtu për të ardhur në këtë tokë e për të kuptuar që njëherë e një kohë ishte si dera e pasme e atdheut tonë.
Dua t’ju falenderoj sërish dhe ta përmbyll me dëshirën që ajo çka ndoshta është tipari më i çmuar dallues i Egjiptit, kultura juaj e jashtëzakonshme do të jetë bazë për bashkëpunimin tonë në fushën kulturore. Ne jemi shumë më të vegjël, por jemi krenarë për kulturën tonë dhe besojmë po kështu që kemi çka t’ju tregojmë njerëzve tuaj. Ju keni kaq shumë gjëra për t’i treguar njerëzve tanë. Le të shohim nga e ardhmja me bindjen se ka pasur një arsye pse historia na ka lidhur kaq fort dhe ta shndërrojmë në besimin se është njëfarësoj amaneti i paraardhësi se midis shqiptarëve dhe egjiptianëve do të ketë një rrugë drejt së ardhmes.
Top Channel
