Gjyqi për vrasjen e aktivistit gay/ Interes i jashtëzakonshëm për gjyqin, aktivistit u vra 3 vjet më parë

Të pandehurit, pronari i një dyqani bizhuterish, një ndërmjetës i pasurive të paluajtshme, si dhe katër oficerë policie mohojnë akuzën për lëndime trupore fatale të 33-vjeçarit Zhak.

‘Të gjithë duhet të marrin pjesën e tyre të fajit. Ata duhet të thonë të vërtetën. Videoja është atje, e gjithë bota e ka parë dhe do të dëshmojë se kush është i pafajshëm dhe kush është fajtor. Të gjithë duhet të gjykohen’- tha gjyshja e viktimës. Pamjet nga kamerat e sigurisë që u publikuan tregojnë Kostopulosin duke u përpjekur të dalë nga një dyqan bizhuterish që ishte i mbyllur, duke thyer derën e xhamit të dyqanit me një zjarrfikës, ndërsa nuk dihet se si kishte hyrë.

I shtrirë në tokë dhe i plagosur nga xhamat, ai është linçuar me një mizori të jashtëzakonshme nga disa persona jashtë dyqanit. Duke besuar se ai ishte një hajdut i droguar, oficerët e policisë që mbërritën në vendngjarje gjithashtu e rrahën dhe e prangosën, ndërsa ai shtrihej i gjakosur në trotuar, I rrethuar nga një turmë njerëzish. Disa orë më vonë 33-vjeçari është deklaruar i vdekur në spital. Të pandehurit ,3 vjet pas vrasjes vazhdojnë të jenë të lirë, madje oficerët e policisë janë ende në detyrë.

Gjyqi, i cili u shty për një kohë të pacaktuar vitin e kaluar për shkak të pandemisë është pritur me interes të madh nga mediat dhe opinioni publik, pasi kushtet në të cilat 33-vjeçari humbi jetën kishin tronditur shoqërinë greke.

Gjithashtu përfaqësues të partive të majta opozitare, sindikaliste, njerëz të artit midis tyre edhe këngëtari i shquar Jorgos Dalaras kanë filluar një fushatë në rrjetet sociale për të informuar opinionin publik në lidhje me vrasjen e Zhak Costopulos dhe gjyqin në vazhdim.

Top Channel