Pas kamionit me banerin provokues, largohen edhe njësitë speciale të Kosovës nga Jarinja
02/10/2021 14:50
Ambasadori i Gjermanisë në Prishtinë: Kosovën e pret punë e vështirë për t’u anëtarësuar në Këshillin e Evropës në maj 16/04 23:01
Pas largimit të kamionit të fundit që mbante një parrullë provokuese në Jarinjë, janë larguar edhe forcat e njësive speciale të Kosovës.
Pas largimit të kamionit që mbante banerin provokues “Mirësevini në asosacionin e komunave serbe” e gjithë rruga kryesore që lidh Kosovën dhe Serbinë dhe anasjelltas është liruar dhe tashmë mund të kalohet lirisht mes dy vendeve.
Normalizimi i situatës në veriun e Kosovës erdhi pas nënshkrimit të marrëveshjes mes dy vendeve në Bruksel për reciprocitetin e targave, dy ditë më parë (30 shtator).
Marrëveshja Kosovë- Serbi për reciprocitetin e targave u arrit 11 ditëve tension në veri.
Palët janë pajtuar për tri pika kyçe:
1.Njësitet speciale policore të vendosura në pikëkalimet e përbashkëta kufitare në Jarinjë dhe Bërnjak do të largohen bashkë me barrikadat, duke nisur nga 2 tetori, nga ora 08:00 deri në orën 16:00 të asaj dite. Misioni i NATO-s në Kosovë, KFOR do të angazhohet në këto dy pika në Jarinjë dhe Bërnjak, para nisjes së tërheqjes të zyrtarëve policorë dhe barrikadave, dhe do të mbetet aty për dy javë për të garantuar sigurinë.
2.Nga 4 tetori, do të nisë së zbatuari regjimi i letrave ngjitëse, në vend të heqjes së targave të makinave të regjistruara në Kosovë dhe Serbi, si masë e përkohshme, deri në gjetjen e një zgjidhjeje të përhershme.
3.Më 21 tetor do të nisë punën një ekip i përbërë nga zyrtarë të Bashkimit Evropian, Prishtinës dhe Beogradit për të gjetur një zgjidhje të përhershme. Brenda gjashtë muajve, prej nisjes së takimit të parë, i ashtuquajtur Grup Punues, do të prezantojë gjetjet për një zgjidhje të përhershme në formatin e dialogut të nivelit të lartë.
Top Channel
