Falsifikim firmash, armë të ftohta dhe mosbindje ndaj urdhrit të policisë/ Çfarë ndodhi orët e fundit në Shkodër, arrestohen 3 persona

01/10/2021 14:19

Policia e Shkodrës ka arrestuar 3 persona për vepra të ndryshme penale dhe ka proceduar penalisht tre të tjerë.

Një 65-vjeçar, i identifikuar me inicialet B.D., u arrestua sepse rezulton se është përgjegjës i ndërmarrjes së shfrytëzimit pyjor pranë Bashkisë Malësia e Madhe.

Ai së bashku me tre persona të tjerë u kapën në vendin quajtur “Rapsh” duke transportuar lëndë drusore pa dokumentacion. Njëri prej tyre i dha policisë një vërtetim transporti të lëshuar për llogari të një subjekti, që rezultonte i falsifikuar. Firmat ishin falsifikuar nga 65-vjecari B.D., banues në Malësi të Madhe. Nga kontrollet në banesën e tij u gjetën vërtetime transporti të tre viteve të fundit.

“Nga Seksioni për Hetimin e Krimit Ekonomiko-Financiar në DVP Shkodër u arrestua në flagrancë shtetasi B. D., 65 vjeç, banues në Malësi të Madhe dhe u proceduan penalisht në gjendje të lirë shtetasit Z. N., 35 vjeç, Z. K., 37 vjeç, të dy banues në Shkodër K. Sh., 52 vjeç banues në Malësi të Madhe.  

Shërbimet e Policisë, në vendin quajtur “Rapsh”, Hot, Malësi e Madhe, kanë ndaluar për kontroll automjetin me drejtues shtetasin Z. N., që po transportonte lëndë drusore pa dokumentacion. Pronari i lëndës drusore, shtetasi Z. K. i ka paraqitur punonjësve të Policisë, një vërtetim transporti të lëshuar për llogari të një subjekti me administrator shtetasin K. Sh. Pas verifikimeve rezultoi se ky dokument ishte lëshuar në kundërshtim me rregullat përkatëse, duke falsifikuar firmat, nga shtetasi B. D., përgjegjës i ndërmarrjes së shfrytëzimit pyjor pranë Bashkisë Malësia e Madhe.    

Në vijim të veprimeve, gjatë kontrollit të ushtruar në banesën e shtetasit B. D., shërbimet e Policisë kanë gjetur dhe sekuestruar vërtetime transporti të tre viteve të fundit, që dyshohet se janë lëshuar në kundërshtim me rregullat përkatëse”, njoftoi policia.

Ndërsa një 18-vjeçar i identifikuar si E.F., banues në lagjen “Partizani”, Shkodër u vu në pranga pasi gjatë kontrollit fizik të ushtruar nga Forcat e Posaçme “Shqiponjat” iu gjetën dhe iu sekuestruan në cilësinë e provës materiale 2 armë të ftohta (doreza metalike), që i mbante pa leje.

Gjithashtu u ndalua 22-vjeçari i identifikuar me inicialet K.Ç., i shpallur në kërkim pasi Gjykata e Rrethit Gjyqësor Shkodër e ka dënuar me 1 muaj burg për veprat penale “Drejtim automjeti në mënyrë të parregullt”dhe “Mosbindja ndaj urdhrit të punonjësit të policisë”.

Materialet procedurale në ngarkim të shtetasve të lartpërmendur i kaluan Prokurorisë pranë Gjykatës së Shkallës së Parë Shkodër, për veprime të mëtejshme.

Top Channel

DIGITALB DIGITALB - OFERTA