Kosova refuzoi gazsjellësin amerikan/ LDK: Veprim i pakuptimtë për interesat shqiptarë, qeveria refuzoi 200 milionë dollarë

Ky gazsjellës ishte i financuar në pjesën më të madhe të tij nga MCC ose Korporata e Sfidave të Mijëvjeçarit, një organizatë amerikane.

Ministrja e Ekonomisë, Artane Rizvanolli ka deklaruar se nuk është bërë e mundur të ecet përpara me marrëveshjen e gazsjellësit, sepse Kosova nuk kishte informacionin nëse ky veprim është hapi i duhur për vendin në tranzicionin e saj energjetik, ndërsa nga ana tjetër “MCC-ja ka afate kohore strikte për zhvillim dhe nënshkrim të programit të kontaktit.

Ndërkohë, Rizvanolli ka njoftuar se është nënshkruar një marrëveshje ndihme me MCC-në për investime me risk më të ulët por që ndihmojnë Kosovën drejt dekarbonizimit të sektorit të energjisë dhe krijojnë kushte për zhvillim ekomomik dhe zhvillim të sektorit privat”.

LDK ka reaguar për vendimin, duke e konsideruar hap i gabuar strategjik dhe veprim të pakuptimtë.
“Një humbje financiare dyqind milionëshe në një vend pa zhvillim”, shkruan LDK në një komunikim për shtyp.

“Sot, Qeveria e Kosovës refuzoi projektin më gjeostraregjik amerikan në Ballkan, atë të gazpërçuesit, që do t’i siguronte shtetit tonë furnizim me gaz e së këndejmi dhe tranzicionin e nevojshëm energjetik.
Përveç se, në paranoizmin e pashpjegueshëm politik, e cilësoi të njëjtin si “gaz rus”, me këtë vendim, Kosova i refuzoi dhe 200 milionë dollarë, që Presidenti Biden, kohë më parë i kishte konfirmuar si grant – fonde falë – për Republikën e Kosovës dhe projektin në fjalë.
Një hap i gabuar strategjik. Një veprim i pakuptueshëm për interesat shqiptare në rajon. Një humbje financiare dyqind milionëshe në një vend pa zhvillim. E pakuptimtë, e dëmshme, e papranueshme. Përkushtimi i Kosovës në projekte strategjike amerikane nuk duhet të ketë hezitim. Ecja jonë strategjike me Shtetet e Bashkuara të Amerikës duhet të jetë e përbashkët në politikë, ekonomi, siguri e energjetikë”.

Top Channel