“Sjellin mbeturina nga gjithë rrethet, Kamza, Kruja e Fushë-Kruja dhe i hedhin këtu. I vejnë shkrepësen. Kjo është zonë turistike. Vinte gjithë Fushë-Kruja dhe lahej te liqeni. Këtu është një liqen shumë i bukur dhe e kanë prishur krejt”.
Është kthyer në gangrenë keqmenaxhimi i mbetjeve urbane në bashkinë e Krujës. I gjithë territori është në emergjencë mjedisore, pasi dy vendgrumbullimet janë jashtë çdo standardi. Në vendgrumbullimin në fshatin Halil të Fushë Krujës plehrat hidhen dhe digjen vazhdimisht duke shpërndarë tymin dhe gazrat toksikë në një rreze të gjerë mbi zonat e banuara.
“Situata është shumë shqetësuese nga plehrat që digjen. Na krijohen probleme kur vijmë këtu në frymëmarrje dhe djegje sysh. Vetëm premtojnë”.
“Asnjë masë nuk merret. Na mbytën fëmijët po edhe ne. Kryetari i bashkisë tha para votimeve se do ti hiqte po aty kanë ngel”.
“Na japin premtime me marr vota. Me 30 prill na thanë do hiqen. Shumë premtime të kota. Robi lidhet nga fjala e gojës. Të paktën të na lejnë të marrim frymë”.
Prej një viti këtu në fshatin Halil mes mbetjeve urbane ka nisur dhe investimi për ndërtimin e depos së re të ujit, e cila ka marrë premtimin se do të përmirësojë ndjeshëm jo vetëm sasinë e ujit të pijshëm për 27 mijë banorë të zonës, por edhe cilësinë e tij.
“Aty afër është depo e ujit që s’ka as ujë. Dhe kjo nuk është vetëm një ditë”.
“S’mund të hamë as një fik. Kam pas mbjellë luleshtrydhe dhe binin mbetjet e djegura mbi to”.
“Ka 20 vjet kam mbjellë 100 rrënjë ulli, po çfarë me ngrënë. Kujt t’i them për dëmin? Tymi i ka nxjerrë jashtë përdorimit komplet”.
Në bashkinë e Krujës nuk ndodhej askush për të na dhënë një përgjigje lidhur me situatën, po në linjë telefonike Drini Masha, drejtor i marrëdhënieve me publikun në bashki deklaroi se do të ndërtohet një landfill i ri konform standardeve në zonën e Fushë Krujës. Gjithsesi ky është një projekt, pasi ende nuk është përcaktuar vendi ku do të ndërtohet landfilli. Deri atëherë mbetjet urbane do të vazhdojnë të hidhen në fshatin Halil dhe në pyllin e Krastes, duke shtuar nivelin e ndotjes dhe ndikimin negativ nga djegia e tyre në shëndetin e banorëve.
Top Channel
