56 emigrantë të paligjshëm u identifikuan sot në një furgon tip “Benz”, në dalje të Pogradecit.
Policia ka arrestuar 46-vjeçarin me iniciale A.M. dhe ka shpallur në kërkim pronarin e mjetit, 36-vjeçarin me iniciale E.H.
Sipas policisë, dyshohet se refugjatët po shkonin drejt Tiranës. Më pas kundrejt pagesës, shtetasi me iniciale A.M. iu kishte premtuar se do t’i çonte në vendet e Bashkimit Europian.
Prokuroria e Pogradecit po vijon hetimet e mëtejshme, ndërkohë që, gjatë muajve të fundit janë të shumta raste të tilla, ku shqiptarët kapen duke ndihmuar emigrantët e paligjshëm.
Njoftimi i policisë:
Shërbimet e Komisariatit të Policisë Pogradec, në bashkëpunim me strukturat për Hetimin e Krimeve në Drejtorinë Vendore të Policisë Korçë, Shërbimet për Çështjet e Brendshme dhe Ankesat Korçë, Policinë Kufitare dhe Policinë Rrugore, në vijim të operacionit të koduar “Perimetri”, kanë goditur një tjetër rast të aktivitetit kriminal të dhënies së ndihmës shtetasve të huaj, për kalim të paligjshëm të kufirit, kundrejt shpërblimit, si rezultat i të cilit u bë kapja dhe arrestimi në flagrancë i shtetasit A. M., 46 vjeç, banues në Durrës dhe u shpall në kërkim shtetasi E. H., 36 vjeç, banues në fshatin Hotolisht, Librazhd.
Shërbimet e policisë rrugore, kanë kapur në dalje të qytetit të Pogradecit, shtetasin A. M., duke transportuar në drejtim të Tiranës, me mjetin tip furgon të markës “Benz” në pronësi të shtetasit E. H., 56 emigrantë të paligjshëm, të cilëve kundrejt shpërblimit iu kishte premtuar kalimin drejt vendeve të BE-së.
Materialet në ngarkim të tyre i kaluan Prokurorisë së Rrethit Gjyqësor Pogradec për veprime të mëtejshme hetimore.
Top Channel
