SHBA, gjykata heq ndalimin mbi armët e sulmit në Kaliforni

Që prej vitit 1989 në Kaliforni ishte e ndaluar shitja e armëve të sulmit. Ndalimi u sfidua në vitit 2019 në një proces gjyqësor kundër Prokurorit të Përgjithshëm të Kalifornisë. Mes paditësve ishte dhe James Miller, banor i këtij shteti si dhe nga përfaqësuesit e një komiteti të veprimit politik pro armëve, me bazë në San Diego.

“Kjo çështje ka të bëjë me atë se si duhet të jetë një e drejtë kushtetuese dhe nëse një shtet mund të detyrojë zbatimin e një politike mbi armët, një eksperiment i dështuar 30-vjeçar, i cili cënon një të drejtë (kushtetuese)”, shkruante gjyqtari Roger Benitez.

“Qeveria nuk ka të drejtë të imponojë politikat e saj të reja ndaj qytetarëve amerikanë, kur bëhet fjalë për të drejtat kushtetuese”, thuhej më tej në urdhrin e gjykatës.

Sipas “Giffords Law Center” një grup që ka si objektiv kontrollin mbi armët, shtatë shtete përfshirë Kaliforninë si dhe kryeqytetin e vendit Uashingtonin, kanë miratuar ligje që ndalojnë armët e sulmit.

Kontrolli ndaj armëve ka qenë gjithmonë një temë politike përçarëse në Shtetet e Bashkuara, ndërsa vendi prej dekadash ka përjetuar një numër të konsiderueshëm incidentesh me armë në shkolla e vende të tjera publike që u kanë marrë jetën një numri të madh njerëzish.

Guvernatori i Kalifornisë Gavin Newsom tha se vendimi i gjykatësit federal ishte një kërcënim i drejtpërdrejtë ndaj sigurisë publike. Ai e quajti atë një “shuplakë të neveritshme” në fytyrë për ata që kanë humbur të dashurit e tyre nga dhuna me armë.

“Fakti që ky gjykatës krahasoi AR-15, një armë lufte që përdoret në fushëbetejë, me një thikë të ushtrisë zvicerane e dëmton plotësisht besueshmërinë e këtij vendimi”, u shpreh guvernatori në një deklaratë./voa

Top Channel