Një kamion i ngarkuar me mallra ushqimorë ka marrë flakë në lëvizje e sipër disa kilometra larg Tepelenës, tek kthesa e Përmetit.
Qytetari i ndodhur në vendngjarje tha për Top Channel, se zjarrfikësit mbërritën vetëm pas 40 minutash, kur kamioni ishte shkrumbuar i gjithi.
Drejtuesi i mjetit, 60-vjeçari me iniciale Xh.K., që ishte i vetmi person në kamion ka marrë dëmtime prej goditjes dhe prej flakëve dhe tymit dhe është transportuar fillimisht për në spitalin e Tepelenës e më pas të Gjirokastrës.
Forcat zjarrfikëse kanë shpëtuar drejtuesin e mjetit i cili është jashtë rrezikut për jetën. Hetimet paraprake ngrenë dyshime se kamioni mund të jetë përplasur fillimisht me bordurën e rrugës dhe pas kësaj ka marrë flakë.
Aksidenti ka shkaktuar bllokimin e rrugës për më shumë se 30 minuta, ndërsa aktualisht situata është normalizuar.
Njoftimi i policisë:
Rreth orës 14:00, njoftohemi se në aksin nacional Gjirokastër- Tepelenë një kamion i ngarkuar me materiale ndërtimi është përplasur me barrierat anësore të rrugës dhe është përmbysur duke marrë flakë.
Për pasojë është dëmtuar drejtuesi i kamionit shtetasi Xh. K., rreth 60 vjeç, banues në Tiranë, i cili ndodhet në spitalin Rajonal Gjirokastër jashtë rrezikut për jetën.
Në vendngjarje shkuan shkuan shërbimet e policisë dhe zjarrfikëse, të cilët bënë të mundur shuarjen e flakëve.
Grupi hetimor po punon për zbardhjen e shkaqeve të aksidentit.
Top Channel
