Veliaj i merr LSI një degë partie/ Tiranë, dega e njësisë 10 në Tiranë i bashkohet PS

Taulant Kalo, ish drejtuesi i degës së LSI dhe anëtarë te tjerë janë takuar me drejtuesi politik i PS për Qarkun e Tiranës, Erion Veliaj. Ai theksoi se dera e PS është e hapur dhe se kjo familje e madhe, nuk diskriminon askënd.

“E vlerësoj shumë këtë bashkim, më mirë vonë se kurrë, por ajo që ju premtoj është se PS-ja do të jetë një derë e hapur dhe një familje që nuk diskriminon. Në PS nuk të thotë askush kush je ti e kush jam unë sepse ne të gjithë, në një moment të jetës sonë kemi bërë eksperimentet tona. Rëndësi ka që e kuptuam se ajo që na bashkon është shumë më e rëndësishme dhe më e madhe se ato që na ndajnë. Interesi i familjes sonë të madhe është më i rëndësishëm, është më i madh se interesi i një familje të vogël, ku partinë e merr një herë burri e një herë gruaja, pastaj burri ia lë gruas, pastaj gruaja ia kthen prapë burrit. Nuk kemi kohë për të humbur! Shprehja ‘bashkimi bën fuqinë’ të vlejë edhe për Njësinë 10, ashtu siç jemi bashkuar me shokë e kolegë të tjerë”.

Veliaj kujtoi se javët e fundit PS-së në Tiranë i janë ribashkuar shumë figura të tjera.

“Na janë bashkuar shumë miq dhe kolegë të komunitetit çam, kur panë se partia e tyre bëri pakt me Dulen dhe u kuptua se i gjithë sherri paska qenë artificial, qenka bërë për një karrige, pra qenka pazar, sherr për plaçkë, jo për parime. Por, unë besoj se ka ardhur koha të mendojmë për familjet tona, jo për partitë që na përçajnë. E kemi kuptuar se familja jonë është më e rëndësishme se sa tekat e këtyre që i kanë lidhur punët me Anglinë dhe Hollandën, e madje as nuk votojnë këtu “Kandidon për kryeministër një njeri që del nga shtëpia pa kartë identiteti, kurse e shoqja nuk voton fare sepse ka pasaportë të huaj. Nuk kemi ç’të presim nga këta njerëz, i kemi provuar disa herë. Ne e provuam edhe Saliun, edhe Ilirin, edhe Monikën, edhe Lulin në bashki, i ngeci sahati dhe trami s’erdhi kurrë”.

Top Channel