Tomini flet për vaksinën ruse, ja përse ekspertët ndryshuan mendim

Tomini tha se vaksinimi masiv të orienton drejt vaksinave të tjera, ndaj përveç Pfizer, ekspertët kanë vlerësuar mundësinë e marrjes së dozave të tjera nga Lindja. Ajo  tha se fluksi i shtuar i infektimeve dhe mos marrja e sasisë së pretenduar nga vaksinat perëndimore hapi mundësitë për kanalet e tjera.

“Ndryshimi nuk është 180 gradë, se ishim fokusuar tek vaksinat e BE, siç ishin Pfizer dhe Moderna. Përpjekjet ishin që të vinin sa më shpejt. Por numri i rasteve filloi të ngrihej vrullshëm. Në shkurt patëm një rritje të kurbës. Dhe për këtë, komiteti i ekspertëve gjykuan edhe mundësinë për të hyrë edhe vaksina të tjera në vend. U bë një gjykim i mirë dhe prandaj vendosën të merreshin,” tha Tomini.

E pyetur përse ky vendim nuk u mor më parë, Tomini tha: “Më 27 dhjetor filloi dhe vaksinimi në botë, ne ishim në tratativa për marrjen e Pfizer. Në fillim nuk kishim mendje për vaksinat nga Lindja, pasi kishim synim 500 mijë vaksina nga Pfizer. Por kurrë nuk është hequr mundësia për marrjen e vaksinave të tjera. Duke filluar që nga protokollet e vlerësimit, evoluimi përkundrejt një vaksinimi masiv të orienton drejt kanaleve të tjera të komunikimit. Për të ulur intensitetin e madh të infektimit, kërkuam dhe kanale të tjera.”

Siparin e ardhjes të vaksinës ruse Sputnik, në vendin tonë e hapi një dhurim prej 10.000 flakonësh, dhuratë ardhur paraditen e të hënës nga Princi i Kurorës së Emirateve të Bashkuara, Muhammed Bin Zayed.

Top Channel