Pop News Të Fundit

Fotot/ Akuzoi produksionin se e detyroi të dilte çift me Tean, ja kontrata e plotë që bëri Andi me “Përputhen”

01/02/2021 21:03

Pas akuzave të shumta nga Andi dhe Tea ndaj produksionit të Përputhen, vetë moderatorja Bora Zemani me kontratën në dorë ka treguar se çfarë përmban ajo.

Kujtojmë se Andi reagoi, fillimisht duke nënkuptuar se ishte i tronditur dhe nuk dinte asgjë, ndërsa më pas bëri një postim të gjatë, që më pas e fshiu, ku nënkuptonte se dinte gjithçka, por ishte detyruar të heshte për shkak të një “kontrate të frikshme”.

Por në puntatën e sotme, prezantuesja e emisionit, Bora Zemani publikoi kontratën që Andi ka firmosur me “PërPuthen”, duke theksuar se në asnjë pikë të kontratës atij nuk i kërkohet të bëjë diçka që nuk dëshiron.

Ajo shprehet se rregullat e kontratës janë mjaft të thjeshta, duke filluar nga orari, ndërsa shtoi se i vetmi penalitet në rast mosrespektimi të rregullave, është një gjobë prej 5 mijë eurosh.

Megjithatë ajo shtoi se ka patur mjaft konkurrentë që i kanë thyer këto rregulla dhe produksioni nuk ka çuar asgjë më tej.

“Kontrata nuk janë vetëm në televizion, por në çfarëdo pune. Ne e kemi kontratën që ata të dy kanë firmosur. Për ta sqaruar për të gjithë, Andi nuk ka kërkuar në asnjë moment të largohej nga emisioni. Ne patëm dyshime kur ai mungoi dhe menduam që ftohtësia e tij erdhi pas akuzave të Fationit, por Andi nuk ka kërkuar në asnjë moment të largohet. Në kontratë, që është firmosur nga Andi, në asnjë moment nuk i kërkohet të bëjë diçka që nuk do, janë disa kërkesa fare të thjeshta dhe nëse ka thyerje do jetë gjobë 5 mijë euro në rast se procedura nga Top-Channel vazhdojnë. Ka patur konkurrentë që i kanë thyer dhe ne si Top-Channel nuk kemi çuar asgjë më tej. Në kontratë nuk ka asnjë detyrim për asnjë, penaliteti i vetëm është një gjobë prej 5 mijë eurosh”, ka sqaruar Bora Zemani.

Siç mund të shihni në dy FOTOT e mëposhtme të kontratës, asnjë pikë e saj nuk i detyron konkurrentët të lidhen çift, apo që të sajojnë situata të caktuara.

Kontrata përmban 6 pika të thjeshta, ku si pikë e parë është dakordësia për të ndjekur të gjitha emisionet e Për’Puthen gjatë gjithë orarit të programuar.

Pika e dytë e kësaj kontrate detyron konkurrentët që të paraqiten sa herë u kërkohet nga autorët e programit në ambientet e Top Channel dhe të zbatojnë oraret.

Në pikën e tretë të kontratës palët bien dakord për përdorimin e të dhënave personale dhe imazhit për transmetim dhe ritransmetim në programacionet e Top Channel.

Pika e katërt e kontratës nënvizon se largimi i konkurrentëve nga program do të bëhet vetëm me pëlqimin e televizionit, në rast të kundërt do të aplikohet një gjobë.

Kontrata vazhdon me pikën e pestë ku konkurrentët pranojnë të reklamojnë sponsorat e programit Përputhen.

Dhe pika e fundit e kontratës detyron palët që të mos shfaqen në media apo spote publicitare pa miratimin e autorëve të programit.