SHBA: Kufizime të reja për frenimin e COVID-19

Një milion infeksione janë regjistruar vetëm javën e fundit. Siç njofton korrespondentja e Zërit të Amerikës, Mariama Diallo, shtetet dhe qytetet po zbatojnë më shumë kufizime për të ndihmuar në luftën kundër një vale në rritje rastesh të reja.

Shtetet dhe qytetet në të gjithë Amerikën po i urdhërojnë dhe u bëjnë thirrje banorëve të qëndrojnë në shtëpi, pak përpara festës kombëtare të Ditës së Falënderimeve javën e ardhshme.

Kryebashkiakja e Çikagos u ka kërkuar banorëve që të kufizojnë grumbullimet në jo më shumë se dhjetë vetë. Masa e re hyri në fuqi të hënën dhe do të zgjasë të paktën një muaj.

Forrest Jones, banor i Çikagos dhe mjek në pension i mbështet masat.

“Nuk mendoj se kemi ndonjë alternativë për fat të keq, për sa kohë që numri i infeksioneve dhe vdekjeve të reja po rritet, ashtu si edhe stresi ndaj aftësisë për t’u kujdesur për njerëzit që sëmuren nga COVID. Kjo është një urgjencë, dhe ne duhet të marrim masa emergjente. ”

Kufizimet e reja në qytetin e Filadelfias do të fillojnë të premten dhe do të zgjasin deri në fund të vitit.

“Do të ndalojmë grumbullimet në ambjentet e brendshme ose aktivitetet e çdo përmase në çdo vend, publik ose privat. Do të thotë jo festa në shtëpi, darka në grupe, grupe që mblidhen për të parë futboll, jo vizita midis familjeve, jo dasma dhe funerale në ambjente të mbyllura”, thotë Dr. Thomas Farley, Komisioneri i Shëndetësisë në Filadelfia.

Guvernatori i Uashingtonit, Jay Inslee paralajmëroi se shteti i tij po përballet me rrezikun më të madh nga virusi deri tani.

“Po përballemi me një valë të tretë që duket se do të jetë më e rrezikshme se ato që kemi parë deri tani. Rastet mesatare ditore në shtetin tonë janë dyfishuar vetëm në dy javët e fundit. Nuk mund të vazhdojë kështu.”

Duke filluar nga e marta, palestrave dhe disa qendrave argëtuese në shtetin Uashington do t’u kërkohet të ndalojnë shërbimet e brendshme. Dhe që nga e mërkura, restorantet dhe baret do të shërbejnë vetëm në ambjentet e jashtme ose për ushqime të porositura.

Po të mërkurën, Miçigani do të fillojë kufizime të reja për të paktën tre javë, përfshirë kalimin e klasave online për shkollat e mesme dhe universitetet, ndërprerjen e sporteve të organizuara dhe ndalimin e ngrënies në ambiente të mbyllura.

“Jemi në momentin më të keq të kësaj pandemie deri më sot. Situata nuk ka qenë kurrë më e tmerrshme. Duhet të marrim masa.”

Të hënën doli një lajm i mirë për një vaksinë të dytë premtuese për COVID. Kompania farmaceutike Moderna tha se rezultatet paraprake zbuluan se vaksina e saj ishte 94.5 përqind e efektshme. Por zyrtarët e saj thonë se ka akoma shumë punë përpara.

“Është një moment historik vërtet i rëndësishëm në luftën kundër pandemisë. Është një lajm i mrekullueshëm të dish se vaksina do të jetë efektive, por na duhet të përfundojmë procesin rregullator, i cili përfshin përfundimin e studimit, nxjerrjen e më shumë të dhënave dhe disa të dhëna sigurie shtesë. Dhe pastaj, natyrisht, duhet të merremi me prodhimin e tyre”, thotë dr. Stephen Hoge, President i kompanisë Moderna.

Ndërkohë kompania farmaceutike Pfizer tha të mërkurën se studimi i saj ka arritur në përfundimin se vaksina e saj është 95 për qind efektive kundër COVID-19.

Top Channel