Greqia ashpërson më tej masat/ Shkollat ​​fillore, kopshtet dhe çerdhet të mbyllura deri më 30 nëntor

14/11/2020 11:40

Në një konferencë për shtyp mesditen e së shtunës ministrja e Arsimit, ministri i Shëndetësisë dhe ai i Brendshëm kanë shpallur si masë të re për përballimin e pandemisë në vend edhe mbylljen e shkollave fillore dhe kopshteve prej ditës së hënë deri në fund të këtij muaji.

Nga e hëna 16 nëntor për dy javë anullohet komplet funksioni i shkollave fillore në të gjithë vendin.
Kopshtet, shkollat fillore do të mbeten të mbyllura për dy javë ashtu si edhe gjimnazet dhe shkollat e mesme.
Ministrja e Arsimit ka sqaruar se mësimi i fëmijëve në shkollat fillore do të kryhet online prej ditës së mërkurë nga ora dy pasmesdite deri në orën 5,ndërsa për gjimnazin dhe liceun do të vazhdojë në orët e mëngjesit .

Vasilis Kikilias Ministri i Shëndetësisë:

Rekomandimi i komisionit u bazua tek lëvizshmëria intensive që vërehet në mënyrë të arsyeshme nga prindërit që dërgojnë fëmijët e tyre në shkollë dhe nga, gjyshërit gjithashtu nga mësuesit apo personeli administrativ. Sipas komisionit minimizimi i levizjes se njerezve dhe respektimi me perpikmeri e masave të tjera mund të çojë në një zvogëlim të rasteve.

Siç ka theksuar edhe ministri i brendshëm, qeveria do të marrë masa për të gjithë prindërit që kanë fëmijë në arsimin e ulët duke u dhënë orar minimal të punës dhe leje të veçantë për dy javë.

Greqia ka rinovuar për të disatën herë masat prej mesit të tetorit pasi sipas specialisteve vala e dytë e pandemisë duket se ndodhet në kulmin e saj, sidomos në Greqinë veriore, në qytetin e Selanikut por dhe në qytetet e tjera rreth tij.

Është karakteristik fakti që për disa orë, prej mëngjesit të së shtunës kanë humbur jetën 20 persona dhe numri i viktimave prej fillimit të pandemisë ka kaluar tashmë shifrën prej 1000 vetësh, ndërsa vazhdon të mbizotërojë gjendja dramatike në spitalet e Selanikut dhe Larisës.

Top Channel