Një operacion antidrogë në dy fshatra të Vlorës ka sjellë arrestimin e kryeplakut dhe inspektorit të zonave të mbrojtura, shpalljen në kërkim të dy kultivuesve dhe një kryeplaku tjetër e hapjen e hetimeve për një inspektor.
Kryeplaku dhe inspektori i zonave të mbrojtura në fshatin Bolenë të Vlorës janë arrestuar për shpërdorim detyre, pasi kanë lejuar kultivimin e kanabisit.
Ata janë D. M., 69 vjeç, banues në Bolenë me detyrë kryeplak i fshatit dhe I. Gj., 64 vjeç, banues po në Bolenë me detyrë inspektor i zonave të mbrojtura në fshat.
Gjatë kontrollit në tokë dhe me dronë nga ajri gjithashtu janë shpallur në kërkim 2 persona në këtë fshat për kultivim kanabisi. Ata janë Q. B., 77 vjeç dhe P. B., 41 vjeç, banues të dy në fshatin Bolenë të Vlorës. Ndërsa në fshatin Vërmik u shpall në kërkim K. Ll., 47 vjeç, banues në lagjen “11 Janari”, Vlorë, me detyrë kryetar i fshatit Vërmik, Vlorë dhe u vu nën hetim A. K., 55 vjeç, banues në fshatin Ramicë, Vlorë, inspektor i pyjeve dhe kullotave në fshatin Vërmik, Vlorë, për veprën penale “Shpërdorim detyre”.
Njoftimi i policisë:
Vlorë
Vijojnë kontrollet e territorit nga toka dhe ajri, me dronë, me qëllim parandalimin dhe goditjen e veprimtarisë kriminale në fushën e kultivimit të bimëve narkotike. Evidentohen dhe goditen dy raste të tentativës për kultivim të kanabisit, në fshatrat Bolenë dhe Vërmik të Vlorës. Arrestohen kryeplaku i fshatit Bolenë dhe inspektori i zonave të mbrojtura në këtë fshat, për shpërdorim detyre.
Shpallen në kërkim 3 shtetas të tjerë. Shërbimet e Policisë, në vijim të punës për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, gjatë kontrollit masiv të territorit, bazuar dhe në informacionet e marra në rrugë operative, kanë evidentuar dhe goditur një rast të tentativës për kultivim të kanabisit në fshatin Bolenë, Vlorë dhe si rezultat janë asgjësuar fidanë të dyshuar cannabis sativa. Në vijim të veprimeve, specialistët për Hetimin e Krimit të Komisariatit Himarë arrestuan në flagrancë për veprën penale “Shpërdorim detyre”, shtetasit: D. M., 69 vjeç, banues në Bolenë, Vlorë, me detyrë kryeplak i fshatit Bolenë, Vlorë. I. Gj., 64 vjeç, banues në Bolenë, Vlorë, me detyrë inspektor i zonave të mbrojtura në fshatin Bolenë, Vlorë.
Gjithashtu u shpallën në kërkim, për veprën penale “Kultivim i bimëve narkotike”, shtetasit: Q. B., 77 vjeç dhe P. B., 41 vjeç, banues të dy në fshatin Bolenë, Vlorë. Kontrollet kanë vijuar dhe në territorin e fshatit Vërmik, ku është evidentuar një tjetër rast i tentativës për kultivim të kanabisit dhe janë asgjësuar fidanë të dyshuar cannabis sativa. Në vijim të veprimeve hetimore u shpall në kërkim shtetasi K. Ll., 47 vjeç, banues në lagjen “11 Janari”, Vlorë, me detyrë kryetar i fshatit Vërmik, Vlorë dhe u procedua në gjendje të lirë shtetasi A. K., 55 vjeç, banues në fshatin Ramicë, Vlorë, inspektor i pyjeve dhe kullotave në fshatin Vërmik, Vlorë, për veprën penale “Shpërdorim detyre”, pasi nuk kanë kontrolluar territorin dhe nuk kanë dhenë informacion për kultivimin e bimëve narkotike. Nën drejtimin e Prokurorisë vijon intensivisht puna për identifikimin dhe kapjen e autorëve të dy rasteve të evidentuara. Materialet i kaluan Prokurorisë, për veprime të mëtejshme.
Top Channel
