Nën hetim për dhunë ndaj foshnjes/ Durrës, vajza 18 muajshe me shenja dhune. Pronari i çerdhes, mohon

Që nga dita kur në trupin e fëmijës u konstatuan shenja dhune në trup, gjyshja dhe e ëma e fëmijës kanë reaguar ndaj edukatores dhe janë përballur me të dhe pronarin e kopshtit, shtetasin Gëzim Dervishi, që ndodhet nën hetim në gjendje të lirë. Aktualisht gjyshja kujdeset për mbesën, ndërsa e ëma punon. Ato kanë zgjedhur të heshtin deri në momentin që çështja do të hetohet dhe drejtësia do të thotë fjalën e saj.

Pronari i kopshtit mohon dhunën e ushtruar ndaj fëmijës, por se ka marrë masa ndaj personelit.

Në polici, nëna e vogëlushes së dhunuar ka deklaruar se pronari i kopshtit ka tentuar t’i japë para për t’i blerë heshtjen për dhunën ndaj së bijës, ndërsa Dervishi thotë se ka tentuar t’ia japë paratë (5000 lekë) për të mbuluar çdo kontroll shëndetësor për fëmijën.

Teksa qëndron në pozita mohuese ndaj dhunës duke deklaruar se fëmija mund të jetë zënë me fëmijë të tjerë, apo dëmtuar jashtë kopshtit, i proceduar penalisht për dhunë, edhe pse e ka pushuar nga puna edukatoren e dyshuar, nuk di të thotë pse është proceduar ai penalisht dhe jo edukatorja.

 Përgjegjësia për çerdhet e kopshtet jopublike mbetet te Ministria e Arsimit, si autoriteti i vetëm që licencon subjektet për ushtrim aktiviteti dhe ofrim shërbimesh për fëmijët në çerdhet dhe kopshtet jopublike, të cilat në të shumtën e rasteve konceptohen si biznese familjare. Madje dhe edukatoret nuk merren në punë përmes portalit, po përmes vlerësimit të pronarëve, apo administratorëve të kopshteve.

Top Channel