Vala e dytë po vjen/ Rriten infektimet në Evropë

Franca, shtoi edhe 1695 raste të reja koronavirusi në 24 orët e shkuara, shifra ditore më e lartë kjo në më shumë se dy muaj duke e cuar totalin në 228576.

Numri i pacientëve me koronavirus në spitale dhe njësitë e kujdesit intensiv është ulur në 24 orët e shkuara sipas të dhënave të agjencisë së shëndetit ndërsa në total, numri i viktimave në vend ka shkuar në 30305.

Në Spanjë po ashtu, pati 1772 infektime të reja 24 orët e shkuara, çka e çoi totalin e rasteve në 305767. Ndërkohë në Greqi, 124 raste shtesë u pikasën 24 orët e shkuara, duke e çuar numrin e përgjithshëm të infektimeve në vend në 4973.

Gjermania ndërkohë raportoi 1045 raste të reja të Covid 19 ditën e shkuar, sipas qendrës për kontrollin e sëmundjes në vend, hera e parë kjo që rastet ditore kalojnë shifrën 1000 në tre muaj.

Hera e fundit që gjermania pa më shumë se 1 mijë infektime të reja në një ditë të vetme, ishte 9 maji. Qeveria gjermane beson se udhëtarët që kthehen nga jashtë janë një burim kryesor i infektimeve ndaj ka urdhëruar testimin e të gjithë atyre që hyjnë në vend. Rritja e rasteve vjen ndërsa gjermania nisi procesin e rihapjes së shkollave ndërsa pushimet e verës po mbarojnë.

Rastet e koronavirusit kanë qenë në rritje që kur vendet nisën të zbusin kufizimet që e çuan ekonominë globale në pikiatë. E ndërsa qeveritë përpiqen të zbusin dëmtimet ekonomike të shkaktuara nga pandemia, masat e distancimit social që duhet të ndalin virusin po bëhen më të vështira për tu respektuar.

Ndërkohë që procesi i zbutjes së masave është pezulluar në disa vende, përfshirë Britaninë e Madhe. E ndërsa frika e valës së dytë po rritet, disa qeveri, mes të cilave ajo spanjolle, greke, portugeze etj, po i bëjnë maskat të detyrueshme në të gjitha hapësirat publike.

Top Channel