Vrasja e 39-vjecarit Emiljano Ramazani një ditë më parë në Elbasan mund të jetë e gjitha e filmuar nga kamerat e sigurisë së bizneseve dhe banesave rrotull.
Burime thanë për Top Channel se janë sekuestruar të gjitha pamjet filmike ndërkohë që mjeti i autorëve është parë të lëvizë disa herë me radhe rreth zonës, në pritje që 39-vjecari të kthehej në banesën e tij në lagjen 28 Nëntori.
Burimet shtuan më tej se babai i tre vajzave duket prej kohësh përgjohej në çdo lëvizje të tijën.
Asnjë të dhënë deri tani zyrtare nuk ka nga Policia e Elbasanit për persona të shoqëruar si dëshmitarë të ngjarjes apo të dyshuar të mundshëm.
Në rrugë jo zyrtare bëhet e ditur se autorët mund të jenë larguar drejt Durrësit, por në vëzhgimin që Top Channel bëri mëngjesin e së martës, në asnjë kryqëzim nuk ka postblloqe policie dhe as forca të shtuara.
Edhe pse një ditë më parë ngjarja e rëndë solli në Elbasan drejtues të rëndësishëm të Drejtorisë së Përgjithshme të Policisë ende nuk ka asnjë autor të dyshuar dhe as shkaqet e krimit të rëndë i cili ndodhi në mes të ditës në një zonë të banuar.
Burimet thonë se hetimet janë përqendruar në fushën e narkotikëve pasi Emiljano Ramazani nuk ishte I panjohur për policinë në këtë drejtim.
Top Channel
