Në studion e emisionit “Top Talk” të drejtuar nga gazetari Denis Dyrnjaja, ishte i ftuar analisti Frok Çupi. Në këto momente është duke u mbajtur dhe një manifestim i thirrur nga Presidenti i Republikës Ilir Meta, e cilësuar prej tij si “besëlidhja kombëtare”. Thirrjeve të presidentit i janë përgjigjur pozitivisht dhe liderët kryesorë të opozitës së bashkuar, me Lulzim Bashën dhe Monika Kryemadhin në krye, të cilët së bashku me mbështetësit e tyre kanë konfirmuar pjesëmarrjen.
Në konferencat e fundit të Metës, ai ka bërë thirrje që personat që do të marrin pjesë në këtë manifestim, duhet të paraqiten me flamuj kuqezi si edhe me lule mimoze, simbol ky i pranverës. Gjithashtu ai ka deklaruar disa herë që protesta do të jetë paqësore dhe evropiane. Por nga krahu tjetër sipas presidentit thirrjet“E duam Shqipërinë si gjithë Evropa”, duhet të buçasin në bulevardin dëshmorët e kombit, vendi ku dhe po mbahet tubimi mbarëkombëtar. Në studio analisti Çupi u shpreh se e shikon këtë manifestim si fundin e një cikli, duke iu referuar këtu metodës së tubimeve, dëmeve të shkaktuara, po ashtu sipas tij dhe cikli i Presidentit Ilir Meta. Analisti bëri një paralele midis manifestimit të sotëm dhe manifestimit për rrëzimin e diktaturës në 20 shkurt të 1991. Për sa i përket thirrjeve patriotike, që këto kohë Presidenti Ilir Meta nuk është kursyer t’i përdorë, analisti u shpreh se këto thirrje janë përdorur nga të gjithë liderët në momentet e tyre të fundit politike, aq më shumë liderët e shoqërive jo të përparuara.
“Kjo që po ndodh sot ka brenda dhe një thelb optimist. Optimizmi qëndron se sot mbyllet një cikël, mbyllet jo vetëm cikli i tij (i referohet presidentit Meta), mbyllet cikli i metodës, cikli i moshës, mbyllet cikli i dëmeve, mbyllet cikli i llojit të dëmeve. Sot nëse do të bëjmë një paralele, vijmë në datën 20 shkurt të vitit 91, kur u rrëzua monumenti i diktatorit në Tiranë.
Sot bie një monument. I gjithë opozicioni në Shqipëri mesa kuptohet paska ngarkuar të gjithë peshën e vet tek Ilir Meta dhe sot ai padyshim që bien. Bien si metodë. E di pse bien si metodë? Sot ju e shikoni se çfarë po ndodh. Ndalohet përfundimisht që të bëhen ato dëme që janë bërë prej 30 vitesh, njësoj siç u ndalua në vitin 90 Ramiz Alisë që të shkoj më përpara. Në 20 shkurt erdhën vullnetarët e Enverit nga malet, e njëjta gjë po i thërret Presidenti i Republikës edhe atëherë po presidenti i thërriti. Bujar Nishani nuk ishte i keq, por ishte vullnetar i Enverit. Këto kanë qenë të gjithë me njerëz me integritet madje për regjimin për sistemin kanë qenë më me integritet sesa këto që do të vijnë sot. E treta, sot dorëzojnë vilat, me këtë rast dorëzohen vilat që janë grumbulluar për 30 vite.
E njëjta gjë ndodhi dhe në vitet 90-91, u dorëzua një pushtet pak a shumë i vogël pasuror, por u dorëzuan vilat që ishin marrë prej dikujt, dhe u dorëzua mbi të gjitha diktatura. Këtu kemi të bëjmë më shumë me dorëzim pasurie se sa një dorëzim të një pushteti të fortë. Kështu që po kthehemi përsëri tek ajo që nisëm të themi. Përse qëndron në këtë autostradë presidenti i republikës, në autostradën e patriotizmit. Në këtë autostradë kanë qëndruar të gjithë liderët në momentet e fundit të tyre, sidomos liderët e shoqërive jo të përparuara”, u shpreh analisti.
Top Channel
