Presioni i protestave, Emmanuel Macron heq përkohësisht dorë nga reforma e pensioneve

Në një letër drejtuar përfaqësuesve të sindikatave, Philippe ka theksuar se në Francë do të zbatohet një rend i vetëm i sistemit të pensionimit dhe se do të hiqen prioritetet sipas sektorëve dhe 42 llojet e pensionimit.

Philippe ka thënë se zbatimi i moshës 64 vjeç për marrjen e pensionit nuk do të jetë në fuqi përkohësisht, duke shtuar se në vend të kësaj, në një konferencë që do të organizohet do të diskutohet financimi në kuadër të reformës.

Ai ka njoftuar se vendimet e kësaj konference do të shpalosen në muajin prill dhe se në rast të një marrëveshjeje me sindikatat para muajit prill, pikat e saj do të shtohen në reformën kontroverse.

Ndërkohë, Konfederata Demokratike e Punës (CFDT) e ka përshëndetur këtë hap të qeverisë, duke paralajmëruar se do të vazhdojnë të luftojnë për ndryshimet e nevojshme të reformës.

Nga ana tjetër, Konfederata e Përgjithshme e Punës (CGT) e ka konsideruar si të pamjaftueshme këtë deklaratë dhe ka kërkuar heqjen e plotë të reformës, duke bërë thirrje për protesta në tërë vendin më 16 janar.

Ndryshe, Philippe më herët kishte njoftuar se mosha e pensionimit do të ngelet 62 vjeç, por paga e plotë do të mund të merret nga mosha 64 vjeç, ndërkohë që sistemi i ri nuk do të përfshinte personat e lindur para vitit 1975.

Reforma e pensioneve do të paraqitet në Këshillin e Ministrave më 24 janar dhe në Asamblenë Kombëtare më 17 shkurt.

Në Paris dhe shumë qytete të tjera të Francës dje u organizuan protesta kundër reformës, gjatë të cilave u regjistruan edhe përplasje midis policisë dhe protestuesve.

Tashmë 38 ditë në Francë po vazhdojnë grevat e nisura kundër reformës së pensionimit të qeverisë së presidentit Emmanuel Macron, që kanë paralizuar shërbimet shëndetësore dhe transportin.

Sipas një ankete të fundit, 75 për qind e francezëve duan tërheqjen ose ndryshimin e reformës./ (Anadolu Agency)

Top Channel