Ka shkuar në tre numri i godinave të shembura me shpërthim të kontrolluar në Universitetin Bujqësor të Tiranës. Ndërkaq shtatë godinat e tjera, janë shembur dhe po shemben me mjetet e Inspektoriatit Kombëtar të Mbrojtjes së Territorit.
Këto dhjetë godina konviktesh, ishin pjesë e kampusit universitar, që ndodhet në Kamëz, por që vetëm dy prej tyre përdoreshin nga studentët, pikërisht godinat të cilat u shpërthyen pasditen e së premtes.
Ndërsa tetë godinat e tjera, që në fillim vitet pas rënies së komunizmit, u zaptuan nga familjarë të ndryshëm.
E gjithë kjo hapësirë, tashmë do të shndërrohet në një tjetër projekt për Kampus Universitar, për të cilin kreu i bashkisë së Tiranës, Erjon Veliaj, tha.
“E para e punë këtu, jo vetëm do bëjmë konviktet më të mira, por do bëhet e gjitha një si park. Do bëhet siç kemi bërë pjesën e liqenit, që u lirua pjesa e liqenit dhe ka dal e gjitha park. Pra edhe për banorët do të jetë një avantazh i madh. Studentët do i kenë të dhjeta konviktet për veten e tyre. Dhe them që njëherë e mirë zgjidhen edhe familjarët.”, tha Veliaj.
Konviktet u dëmtuan nga tërmeti i datës 26 nëntor, duke i shpallur të pabanueshme, dhe me njëVendim të Këshillit Bashkiak të Tiranës, u vendos shembja e tyre. Ndërkaq për studentët dhe banorët që jetonin nga këto konvikte, bashkia e Tiranës, ka premtuar hapësira me qera.
Andi Bora
Top Channel
