Presidenti izraelit: Marrëveshja e armëpushimit me Libanin duhet të garantojë siguri për banorët e Izraelit verior 26/11 22:47
Shefi i ri i diplomacisë evropiane dhe nënkryetari i Komisionit Evropian Josep Borrell tha se përbërja e re e Komisionit Evropian gjatë mandatit të tij do të përqendrohet kryesisht në migracionin dhe ndryshimin e klimës, duke theksuar nevojën që BE të orientohet më shumë drejt botës dhe më pak drejt vetvetes.
“Unioni u krijua për të zgjidhur problemet e brendshme midis evropianëve. Pastaj u drejtua përbrenda, drejt krijimit të paqes dhe marrëdhënieve të mira. Tani që mund të themi se problemet e brendshme janë zgjidhur pak a shumë, BE duhet të marrë një rol më të madh në botë. Duhet të jetë një aktor me orientim botëror ”, tha Borrell në një intervistë për gazetën ‘Veçernji List’ të Zagrebit.
Ai përmendi ndryshimin e klimës si një shembull të nevojës për një orientim të ri.
“Nëse evropianët vendosin të lëshojnë dyoksid karboni në atmosferë nesër, problemi do të mbetet pothuajse i njëjtë, duke pasur parasysh pjesën e vogël të Evropës në emetimet globale të CO2. Pra, nuk ka të bëjë vetëm me ato që bëjmë ne vetë, por bëhet fjalë për ato që bëjnë të tjerët ”, tha Borrell.
Ai përmendi problemin e migrimit si një shembull tjetër të nevojës që BE-ja të orientohet më shumë drejt botës, transmeton KosovaPress.
“Migracioni po vjen nga përtej kufijve tanë dhe kjo është një çështje gjeopolitike. Kjo është arsyeja pse migracioni është gjithashtu problemi im, pasi zgjidhja e këtij problemi përfshin lidhjen e marrëveshjeve me vendet e origjinës dhe tranzitit,”tha Borrell.
I pyetur se çfarë lloj politike do të mbronte KE-ja e re në marrëdhëniet me Rusinë, Borrell tha se një pjesë e vendeve anëtare të BE-së dëshirojnë normalizimin e marrëdhënieve, ndërsa të tjerët e kundërshtojnë atë.
“Është e qartë se vetëm sanksionet nuk funksionojnë, pasi ato nuk janë politikë e jashtme. Politika e jashtme duhet të jetë më e gjerë se vetë sanksionet. Por duhet të biem dakord për këtë, gjë që nuk është e lehtë në këtë situatë, duke marrë parasysh që ato janë për normalizim të menjëhershëm dhe të tjerët që ato të mbeten siç janë”, tha Borrell.
I pyetur se kush, në të vërtetë, është përgjegjës për politikën e jashtme në BE, ai apo vendet anëtare më të fuqishme, Borrell tha se ai është në krye të politikës së jashtme të përbashkët të BE-së, e cila, siç shtoi ai, ekziston së bashku me politikat e jashtme kombëtare.
“Një ditë, nuk e di kur do të jetë kjo, politika e jashtme e përbashkët do të bëhet unike. Kjo nuk do të ndodhë së shpejti … Anëtarët me kapacitet më të madh gjithashtu kanë një iniciativë në këtë drejtim. Unë jam i kënaqur me këtë, por detyra ime është të ndërtoj një politikë të jashtme të përbashkët dhe një qasje të përbashkët, megjithëse e dimë që në disa raste është shumë e vështirë, pasi disa çështje shkaktojnë përçarje,” tha mes tjerash shefi i ri i diplomacisë evropiane.
Top Channel
