Protesta në Hong Kong, policia: Sundimi i ligjit në “prag të kolapsit”

Paralajmërimi erdhi një ditë pasi territori autonom kinez pa një përshkallëzim të theksuar të dhunës, me policinë, e cila qëlloi një aktivist. Një përkrahës pro-Pekinit u dogj më vonë nga protestuesit antiqeveritarë. Protestuesit vazhduan të përlesheshin me policinë të martën në rrethin qendror të biznesit dhe në universitete. Sipas agjencisë së lajmeve AFP, qindra protestues të maskuar u panë duke hedhur tulla dhe objekte të tjera, ndërsa policia përdori gaz lotsjellës për t’i detyruar ata të ktheheshin.

Por kishte edhe mijëra punëtorë të zyrës që dilnin në rrugë, duke brohoritur paqësisht: “Luftoni për liri, qëndroni me Hong Kongun!”

Protestat filluan në qershor kundër një plani të tërhequr tani për të lejuar ekstradimin në territorin e Kinës, por që nga atëherë janë shndërruar në demonstrata më të gjera, me aktivistë që kërkojnë demokraci më të madhe dhe përgjegjësi të policisë në Hong Kong. Sot, zëdhënësi i policisë Kong Wing-cheung tha se protestuesit përdorën dhunë pa dallim ndaj njerëzve të pafajshëm.

“Sundimi i ligjit i Hong Kongut ndodhet në prag të kolapsit të plotë pasi protestuesit e maskuar në mënyrë të pamëshirshme përshkallëzojnë dhunën e tyre me shpresën se mund të shpëtojnë prej saj,” u tha ai gazetarëve, duke shtuar se sulmi ndaj mbështetësit pro-Pekinit po hetohet si vrasje në tentativë.

Përplasjet shpërthyen sot në Universitetin Kinez të Hong Kongut, me policinë që gjuante gaz lotsjellës për të shpërndarë studentët, ndërsa në Universitetin e Qytetit pati mosmarrëveshje midis studentëve dhe policisë. Policia vazhdoi të përdorë gaz lotsjellës në përpjekje për të shpërndarë protestuesit. Dhjetëra shkolla vendore dhe ndërkombëtare në të gjithë Hong Kong thanë se do të mbyllen sot për shkak të shqetësimeve të sigurisë, por kryeshefi ekzekutiv Carrie Lam tha se përkundër trazirave, nuk do të ketë pezullim të mësimit.

Top Channel