Rreth 25 gra dhe fëmijë shqiptarë të Kosovës, të afërm të të ashtuquajturëve luftëtarë të Shtetit Islamik, kanë shpëtuar nga kampet në Siri që kur Turqia filloi inkursionin e saj ushtarak, tha një organizatë e përfshirë në përpjekjen për të sjellë anëtarët e familjes së militantëve në shtëpi.
Bedri Elezi, drejtor për studime të sigurisë në Institutin e Kosovës për Studime Ndërkombëtare, i cili ka ndihmuar në riatdhesimin e të afërmve etnikë shqiptarë të të ashtuquajturve luftëtarë të Shtetit Islamik nga zona e konfliktit të Lindjes së Mesme, tha për BIRN të martën se rreth 25 gra dhe fëmijë kanë shpëtuar nga kampet Al-Hawl dhe Ein Issa në veri të Sirisë.
“Për momentin ata janë në kufi me Turqinë, po shpresojnë të kalojnë dhe më në fund të kthehen në shtëpi,” tha Elezi.
“Qeveria e Kosovës duhet të jetë në kontakt me Turqinë dhe t’i kthejë ato. Duke bërë këtë gjë rreziku është më i vogël, ndërsa rreziku më i madh mbetet ai që këto gra dhe fëmijë bashkohen përsëri me ISIS, “shtoi ai.
Media njoftoi se 700 gra dhe fëmijë u arratisën nga Ein Issa pasi pati bombardime pranë kampit dy ditë më parë.
Para fillimit të inkursionit ushtarak turk në Siri javën e kaluar, mbi 50 gra dhe fëmijë nga Kosova dhe rreth 52 fëmijë nga Shqipëria kishin jetuar në kampe me muaj.
Pothuajse të gjitha gratë dhe fëmijët shqiptarë jetonin në kampin Al-Hawl, por ato nga Kosova ishin gjithashtu në kampet Al-Roj dhe Ein Issa.
Më 20 Prill, Kosova ishte në gjendje të sillte në vend 110 qytetarë të saj nga zona e konfliktit sirian – 32 gra, 74 fëmijë dhe katër burra. Sidoqoftë, të tjerët u lanë pas në kampe.
Në Shqipëri, një i afërm i dy personave që jetonin në kampe tha se ai i ishte drejtuar kryeministrit Edi Rama për të bërë përpjekje për t’i rikthyer ato.
“Përgjigja që mora ishte se ata nuk mund të bënin asgjë pasi çështja ishte komplekse dhe duhej të koordinohej edhe me shtetet e tjera,” i tha BIRN Xhetan Ndegjoni, i cili është përpjekur të kthejë nipin dhe mbesën e tij për gati gjashtë vjet.
Ndregjoni tha se ishte i shqetësuar për mesazhet më të fundit që mori prej tyre të hënën.
“Mbesa ime Eva më shkruajti nga Al-Hawl se gjërat nuk ishin aspak të mirë dhe unë nuk kam më të dhëna se çfarë do të sjellë e ardhmja,” tha ai.
Raportet nga Al-Hawl, i cili pret gati 70,000 gra dhe fëmijë nga e gjithë bota, thonë se situata në kamp është e vështirë, me përleshje midis disa grupeve, protesta të dhunshme dhe përpjekje të vazhdueshme për arratisje.
Ambasadori i Turqisë në Tiranë, Murat Ahmet Yoruk, tha në një konferencë për shtyp të hënën tha se riatdhesimi i luftëtarëve të ISIS dhe grave dhe fëmijëve nga Siria ishte një përparësi.
Yoruk tha se Turqia po shkëmbente informacione me qeverinë shqiptare, por nuk dha më shumë detaje rreth asaj se kur mund të pritet një përpjekje për riatdhesim.
Top Channel
