Prokuroria kërkon arrest me burg për Bledar Tocin, shefin e sigurisë në burgun e Durresit, të arrestuar pas ngjarjes në banesën e Marsida Qatjas në Kavajë, ku mbeti i vrarë Dritan Hoxholli.
Për organin e Akuzës ai është i dyshuar për veprën penale të vrasjes me dashje dhe prodhimin dhe shitjen e narkotikëve. Po ashtu arrest me burg kërkohet edhe për vëllain e tij Bernard Toci, ku pas kontrollit në banesë iu gjet lëndë narkotike.
Në dosjen prokurorisë që ka siguruar Top Channel, thuhet se Marsida Qatja i kishte kërkuar Bledar Tocit që ti zgjidhte një problem që ajo kishte me viktimën Dritan Hoxholli. Prokuroria thotë se në shtëpinë ku ndodhi krimi pasditen e datës 9 tetor, ndodheshin Bledar Toci, Ermir Cela dhe Xhulio Biturku. Atje ishte konsumuar lëndë narkotike e llojit kokainë dhe pije alkolike. Drogën atyre, thotë prokuroria, ua kishte çuar në banesë Bernard Toci, vëllai i Bledarit, edhe ky i arrestuar.
30 minuta pas mesnate në banesën e Marsida Qatjas ka shkuar Dritan Hoxholli. Ai ka hyrë me automatikun model 56 dhe ia ka drejtuar shtetasit Xhulio Biturku, ndërsa të parin qëlloi Bledar Tocin dhe e la të plagosur. Ky i fundit e qëlloi Hoxhollin me armën e shërbimit Glock, dhe ai mbeti i vdekur në vend.
Si provë materiale në vendin e ngjarjes u sekuestrua një kallashnikov, 15 gëzhoja, një krehër fishekësh automatiku me 27 copë fishekë, si edhe sende të tjera.
Ndërkohë në spitalin e Kavajës ku mbërriti i plagosuri Toci, u sekuestrua edhe arma e zjarrit e punonjësit të burgjeve, pistoleta Glock.
Ne intervistën e saj dhënë një ditë më parë për Top Channel, Marsida Qatja tregoi për njohjen që kishte me viktimën si edhe me të arrestuarin si të dyshuar për vrasjen e tij.
Top Channel
