Pas alarmit për ranitidinën, barin që përdoret për çrregullimet e stomakut, Agjecisa Europiane e Barnave u kërkon të gjithë kompanive që prodhojnë barna, të rivlerësojnë të gjitha llojet e medikamenteve që ata prodhojnë për praninë e mundshme të nitrosaminave dhe të testojnë të gjitha produktet që përmbajnë këto lëndë.
Në faqen zyrtare EMA në këtë njoftim kërkohet që nëse zbulohen substanca të kësaj familjeje të njoftojnë menjëherë autoritetet në mënyrë që të ndërmerren hapa rregullatore.
Sipas EMA-s të gjitha barnat e autorizuara për përdorim njerëzor duhet të ekzaminohen, përfshirë barnat gjenerike dhe ato OTC, pra barnat që jepen pa recetën e mjekut.
Duke pasur parasysh numrin e madh të produkteve të aprovuara mbajtësit e autorizimit të marketingut duhet ti japin përparësi disa lloje barnash, të cilat jepen me doza maksimale ditore, jepen për një kohë të gjatë trajtimi dhe e kanë një numër të madh pacientesh nga të cilët përdoren. Këto barna duhet të testohen të parat.
Nitrosaminat thuhet në njoftimin e EMA-s, Agjensisë Europiane të Barnave janë klasifikuar si agjente të mundshëm kancerogjene për njeriun, që do të thotë se ata persona që përdorin një bar me përmbajtje nistrosamine për një kohë të gjatë dhe me doza maksimale mund të kenë rrezik të shtuar për kancer.
Nitrosaminat janë të pranishme edhe në ushqime apo dhe uji i pijshëm. Ky investigim mbi barnat duhet të përfundojë brenda tre viteve paralajmëron EMA.
Top Channel
