Turistët u shtuan edhe në vjeshtë! Instat: Muaji tetor, 9.3% më shumë të huaj sesa një vit më parë
26/11 10:54
Koncesioni i bllokuar i pompave të karburanteve ka përfunduar në gjykatë. “Noa Control”, kompania që ka bërë propozimin e pakërkuar për këtë koncesion, ka paditur Komisionin e Prokurimit Publik në Gjykatën Administrative, duke i kërkuar të zhbllokojë procesin.
Tenderi për dhënien me koncesion të kontrollit të pompave në stacionet e karburanteve ishte parashikuar të zhvillohej në tetor të vitit të kaluar. Por, pak ditë para tenderit, një kompani zvicerane u ankua në Komisionin e Prokurimit Publik për mungesë transparence dhe procedura të jashtëligjshme, të cilat sipas saj çonin në fitues të paracaktuar.
Pas ankesës, Komisioni i Prokurimit u detyrua ta pezullojë tenderin, duke i kërkuar Ministrisë së Financave të vërë në dispozicion informacione shtesë, për të gjitha pretendimet e ngritura nga kompania zvicerane.
Që nga pezullimi i tenderit, projekti i qeverisë për të dhënë me koncesion kontrollin e pompave ka qenë i bllokuar. Por, tani “Noa Control”, kompania favorite për të fituar këtë koncesion, i ka kërkuar gjykatës që të detyrojë Komisionin e Prokurimeve t’i përgjigjet zyrtarisht ankesës së kompanisë zvicerane, për të zhbllokuar procesin.
Aktualisht, kontrolli i pompave në stacionet e karburanteve kryhet nga Drejtoria e Metrologjisë. Për këtë, kompanitë e karburanteve paguajnë rreth 100 euro në vit, për çdo pompë që kanë në stacionet e tyre.
Koncesioni ia kalon këtë shërbim në kushte monopol një kompanie private, e cila pritet që në 20 vitet e koncesionit të fitojë mbi 60 milionë euro nga kjo kontratë, e të kryejë vetëm 500 mijë euro investime.
Top Channel
