Pagesa më të lira në banka! Hyrja e Shqipërisë në SEPA, vitin e parë kursehen 20 milionë euro
23/11 15:07
Skandali i kompanisë guackë Dunwell Haberman thellohet më tej.
Operatori i Sistemit të Transmetimit (OST) i ka parapaguar rreth 2.4 milionë euro kompanisë DH Albania për të nisur punimet në ndërtimin e linjës Burrel-Peshkopi, por më vonë këto para’ janë kthyer mbrapsht.
Lajmi konfirmohet nga Prokuroria e Tiranës. Burime nga institucioni i akuzës thanë për Top Channel se pas nënshkrimit të kontratës, OST ka bërë menjehërë pagesë për DH Albania, por transferta ka rezultuar pa dëm ekonomik, pasi paratë janë kthyer mbrapsht pas shpërthimit të skandalit që çoi në anulimin e tenderit.
Në fakt, kjo është një procedurë që zbatohet nga një pjesë e madhe e institucioneve publike, të cilat pas nënshkrimit të kontratave parapaguajnë kompanitë private me 20% të vlerës për të filluar punimet në terren. Kjo praktikë është zbatuar edhe në rastin e linjës Burrel-Peshkopi, edhe pse paratë janë kthyer menjëherë mbrapsht pasi OST anuloi tenderin.
Më parë, OST e ka mohuar që të ketë paguar para për DH Albania, por tashmë transferta është konfirmuar nga hetimet e prokurorisë.
Skandali i kompanisë DH Albania shpërtheu pas publikimit të dokumenteve që tregonin se kompania mëmë e saj, Dunwell Haberman, e regjistruar në Delaware kishte falsifikuar firmën e Sekretarit të Shtetit për të fituar tenderin e Unazës së Re në Tiranë dhe atë të linjës elektrike Burrel-Peshkopi.
Si Autoriteti Rrugor, ashtu dhe OST u justifikuan se nuk mund të verifikonin origjinalitetin e dokumentave të dorëzuar nga DH Albania në tender, por tashmë çështja është nën hetim nga Prokuroria e Tiranës.
Top Channel
