Presidenti izraelit: Marrëveshja e armëpushimit me Libanin duhet të garantojë siguri për banorët e Izraelit verior 26/11 22:47
Shtetet e Bashkuara po planifikojnë dërgimin e një anijeje luftarake në detin e Zi. Rrjeti mediatik amerikan CNN thotë se zyrtarët ushtarakë amerikanë kanë kërkuar nga Departamenti i Shtetit të njoftojë Turqinë, mbi planin që luftanija të kalojë nëpër ngushticat e Bosforit dhe të Dardaneleve, të cilat ndajnë Stambollin dhe lidhin Mesdheun me detin e Zi.
Për këtë raport të tij, CNN-i citon 3 zyrtarë amerikanë, të cilën nuk deshën të identifikoheshin. Një traktat disadekadësh kërkon që të gjitha vendet, të cilat nuk kanë dalje në detin e Zi, ta njoftojnë Turqinë 15 ditë më herët për kalimin e luftanijeve të tyre nëpër këto ujëra.
Ideja, megjithatë nuk është finalizuar ende. Komandanti Kyle Raines, zëdhënës i Flotës së 6 të SHBA-ve, sqaroi ndërkohë se forcat amerikane kryejnë vazhimisht operacione për të avancuar sigurinë dhe stabilitetin përgjatë zonës së veprimit të Flotës së 6-të amerikane, që përfshin ujërat ndërkombëtarë dhe hapësirën ajrore të detit të Zi.
“Ne rezervojmë të drejtën për të vepruar lirshëm në përputhje me ligjet dhe normat ndërkombëtare”, tha Raines.
NATO, që përfshin disa shtete anëtare të detit të Zi dhe Shtetet e Bashkuara, ka dërguar vazhdimisht anije luftarake për të patrulluar në detin e Zi, pavarësisht shqetësimeve të Rusisë. Plani amerikan vjen në një kohë tensionesh të shtuara mes Uashingtonit dhe Moskës mbi një sërë çështjesh, por edhe përshkallëzimit të situatës mes Ukrainës dhe Rusisë, pas incidentit në detin Azov, kur forcat ruse hapën zjarr ndaj 3 anijeve ukrainase.
Top Channel
