Ish-lideri i Syriza-s mban “premtimin”, Stefanos Kasselakis krijon partinë e re politike 23/11 16:44
Një gjykatës federal ka bllokuar një urdhër të lëshuar nga presidenti Trump, për t’iu mohuar azilin emigrantëve që kalojnë ilegalisht kufirin jugor të Shteteve të Bashkuara.
Gjykatësi i distriktit në San Francisco dha vendimin e bllokimit të përkohshëm të urdhrit, pasi dëgjoi argumentet e grupeve të të drejtave civile.
Trump nënshkroi urdhrin më herët gjatë këtij muaji, si reagim ndaj karvanit të emigrantëve që po i afrohej kufirit. Ai citoi shqetësime të interesit kombëtar, por u kundërshtua nga grupet e të drejtave civile. Këto të fundit e çuan rastin para gjykatës, duke argumentuar se urdhri i Trumpit ishte i paligjshëm.
Në vendimin e tij, gjykatësi tha se legjislacioni aktual e bën të qartë se, çdo i huaj që arrin në SHBA mund të aplikojë për azil. Ai tha se urdhri i 9 nëntorit i presidentit Trump është një devijim ekstrem nga praktikat e mëparshme.
“Pavarësisht qëllimit të autoritetit të presidentit, ai nuk mund të rishkruajë ligjet e emigracionit për të imponuar kushte që Kongresi i ka ndaluar”, tha gjykatësi.
Me mijëra emigrantë nga vendet e Amerikës Qendrore po udhëtojnë drejt veriut prej javësh, në përpjekje për të arritur kufirin SHBA-Meksikë. Ata thonë se po i largohen persekutimit, varfërisë dhe dhunës në vendet e tyre si Hondurasi, Guatemala dhe El Salvadori.
Në prag të zgjedhjeve të mesit të mandatit, Trump tha se shumë nga emigrantët ishin kriminelë dhe i quajti karvanët, një pushtim, duke urdhëruar edhe dërgimin e trupave ushtarake në kufi.
Top Channel
Ish-lideri i Syriza-s mban “premtimin”, Stefanos Kasselakis krijon partinë e re politike 
