Gjatë mbledhjes së Këshillit Bashkiak të Durrësit, këshilltarët kërkuan transparencë për investimet që po kryhen në qytet dhe situatën flagrante të patjetërsuar në vendgrumbullimin e mbetjeve urbane në Porto Romano, ku vazhdojnë të hidhen e digjen plehrat.
“Kemi rreth 3 muaj që ne si Këshill Bashkiak kemi shpallur gjendjen e emergjencës mjedisore për vendgrumbullimin e mbeturinave në Porto Romano dhe sot e kësaj dite, jo vetëm që nuk është ndaluar hedhja e mbetjeve, por ato hidhen e digjen çdo ditë atje, nga ku 20 mijë studentë po helmohen përditë, sikurse edhe pjesa tjetër e qytetit”, tha Shkëlqim Fortuzi, këshilltar bashkiak demokrat.
Kreu i grupit të këshilltarëve bashkiakë të PS-së tha se, Porto Romano do të kthehet në një park për fëmijët dhe plehrat e Durrësit do të kenë si destinacion inceneratorin e Sharrës, por ai nuk deklaroi se kur do të ndodhë kjo.
“Pas kaq vitesh po shohim vendim dhe ndoshta shumë shpejt, pasi po punohet bashki-qeveri, në mënyrë që qeveria të garantojë për 6 vite transportin dhe pas kësaj periudhe të jetë detyrim i bashkisë”, tha Alfred Mullaraj, këshilltar bashkiak socialist.
Këshilltarët e opozitës ngritën gjithashtu shqetësimin e prerjeve masive të pemëve në qytet dhe zgjerimin e shtrimin e trotuareve me mermer, si pjesë e shpërdorimit dhe abuzimit me fondet publike nga ana e bashkisë.
“Rruga e portit është vonuar për shkak se kryetari i Bashkisë, i cili duhej të ishte këtu sot, por nuk është sepse ka hallet e veta siç e dini edhe ju, donte të merrte rrugën brenda portit. Qëllimi kryesor nuk është krijimi i trotuareve, rregullimi i rrugëve, por abuzimi me fondet publike. Sa më i madh të jetë fondi, aq më i madh është abuzimi”, tha Armand Teliti.
Këshilltarët bashkiakë të Durrësit miratuan të gjitha pikat e rendit të ditës, në këtë mbledhje të radhës, ku mungoi kryebashkiaku Vangjush Dako, i përfshirë së fundmi në një debat publik mbi përgjimet e personave me precedentë kriminalë dhe rolin e tyre në procesin zgjedhor.
Top Channel
