Bullgari, përplasje mes shtetit dhe biznesit

Objekti i parë ishte një nga pronarët më të mëdhenj të hoteleve në Bullgari – Vetko Arabaxhiev, familja e tij dhe partnerët e tij. Vetë fakti se gjatë kontrollit në disa prej hoteleve të tij në vend u zbuluan më shumë se 5 mln euro cash me prejardhje të panjohur shkakton mjaft dyshime. Derisa autoritetet hetonin krimet e tij eventuale hotelieri dhe bashkëshortja e tij ishin në vilën e tyre në Francë. Ku janë tani, nuk dihet, por është e sigurt se nuk janë në Bullgari. Hetuesit janë të bindur se tërë familja Arabaxhievi ka biznes ilegal dhe paratë e gjetura në zyrat e tyre nuk janë fituar në mënyrë të ligjshme.

Pas pronarëve të hoteleve, nën goditjen e organeve  ishte biznesi i alkoolit. Pronari i distilerisë së dytë për nga madhësia në vend, në qytetin Karnobat, Minjo Stajkov u kap, ndërsa pas kësaj uzina e tij për prodhim pijesh alkoolike dhe verëra u kontrollua me qëllim gjetjen e provave për prodhim ilegal dhe mospagim taksash. Kantina e verës “Çernomorsko Zllato” (Ari i Detit të Zi) e një prej afaristeve më të shquara bullgare Petja Sllavova gjithashtu ishte kontrolluar.

Në listën e veprimeve të organeve të rendit u shtua dhe skandali i lidhur me një nga kompanitë prijëse në fushën e ndërtimit GP Group dhe vetë Kryeministri Bojko Borisov urdhëroi që ajo të hiqet nga të gjitha projektet e financuara nga Brukseli. Dhe kjo u bë pasi në mediet dolën të dhëna për mashtrime të shumta nga ana e saj me mjete evropiane.

Të gjitha këto aksione në fjalë të autoriteteve që kanë të bëjnë me dyshime për praktika të paligjshme të përfaqësuesve të biznesit të madh në vend flasin për probleme ndërmjet rrjeteve të afaristëve dhe institucioneve shtetërore. Cilat pikërisht janë ato, kush dhe pse i provokon, tani për tani nuk është e qartë. Por është e qartë se të gjitha masat e ndërmarra kundër informalitetit, korrupsionit dhe mashtrimeve po ndikojnë pozitivisht imazhin e qeverisë . Në Bullgari askush nuk i do personat e pasur dhe të suksesshëm, sepse dominon mendimi se mirëqenia e tyre nuk është arritur në mënyrë të ndershme.

Nga kjo pikëpamje veprimet e organeve kompetente duhet të provokojnë miratim. Por nga ana tjetër skandale, akuza, arreste, kontrollime dhe sekuestrime të ngjashme ka pasur edhe më parë, por deri më sot nuk ka asnjë biznesmen të madh të ndëshkuar. Dhe nuk është e rastit se Brukseli mendon se problemi më i madh i Bullgarisë është drejtësia. Gjyqësori ynë nuk mund të zgjidhë kazuse të ndërlikuara dhe raste të rënda të korrupsionit. Bullgaria ka nevojë për biznes të hapur, të ndershëm dhe transparent, i cili respekton ligjet, kurse biznesi ka nevojë për qëndrueshmëri dhe respekt nga ana e autoriteteve shtetërore, raporton Radio Bullgaria.

Top Channel