Fiks Fare/ Fëmijë analfabetë në klasa kolektive në Vlorë

Shkak u bë mungesa e një mësuese/i. Banorët e fshatit u ankuan në Fiks fare se, edhe në të kaluarën situata ka qenë e njëjtë, pasi askush nuk preferon të shkojë në atë shkollë, për shkak të largësisë dhe rrugës së keqe. Ata thanë se fshati është lënë në harresë nga qeveria dhe pushteti lokal, aq sa investimet e fundit janë bërë para viteve ’90. Ata thanë se, megjithëse janë vetëm 8-9 kilometra larg nga Selenica dhe nga Poçemi, duhet një kohë rreth 50-60 minuta për të përshkuar. Rruga është e shtruar me kalldrëm, ndërsa në të janë hapur gropa të mëdha, duke vështirësuar edhe qarkullimin. Banorët thanë se, nisur nga kjo situatë, edhe mësuesit e kanë braktisur këtë shkollë.

Disa prindër pohuan se, fëmijët e tyre të mitur, nga klasa e parë deri në të 5-ën, nuk kanë bërë mësim. Mësuesja është caktuar vetëm në datën 8 tetor, ndërsa Fiksi shkoi në atë klasë. 10 fëmijët kishin probleme të mëdha në dije, aq sa dy nxënës të klasës së pestë nuk dinin të lexonin dhe shkruanin. Deri më sot, fëmijët kishin marrë mësim nga mësuesja e letërsisë e 9-vjeçares, e cila mësonte nxënës nga klasa e parë deri në të 9-ën. Mësuese Miranda, e caktuar nga DAR Vlorë, tha se në ditën e parë të saj, u ka bërë një testim fëmijëve dhe kishte konstatuar probleme të mëdha. Ajo tha se fillimisht nxënësve do t’u mësojë të shkruajnë dhe të lexojnë dhe më pas të tjerat. Ndërkohë, mësuese Jonida e letërsisë tha se e ka bërë nga humanizmi detyrën dhe nuk është faji i saj kjo situatë.

Fiksi shkoi edhe në klasën tjetër kolektive, atë nga klasa e gjashtë deri në të 9-ën. Ishin gjithsej 7 fëmijë, të cilët po mësonin në të njëjtën orë letërsi dhe histori. Ata thanë se kanë nga 13, 14 apo 16 lëndë dhe këto lëndë i japin vetëm dy mësues; një e letërsisë dhe një mësues bio-kimie. Mësuesja e letërsisë jep lëndët shoqërore, ndërsa i bio-kimisë jep lëndët shkencore, plus edhe gjeografinë.

Për këtë situatë, Fiksi shkoi në DAR Vlorë, ku përgjegjësja Autora Strakosha tha se është në dijeni të situatës në atë shkollë, pasi një testim i bërë nga ministria e Arsimit nxori problematikat në fjalë. Ajo tha se është bërë një program, ku fëmijët, pavarësisht nga klasat që janë, do të mësojnë fillimisht të shkruajnë dhe lexojnë. Kërkesat e prindërve që të transferojnë nxënësit nga klasa e 6 deri në të 9 në një shkollë tjetër, ajo tha se DAR Vlorë ka tenderuar disa herë transportin, por asnjë shoqëri nuk e ka marrë përsipër, për shkak të rrugës së keqe.

Gazetarët e Fiksit shkuan edhe në bashkinë e Selenicës, për të pyetur nëse do të rregullohet apo jo rruga. Nënkryetari Neim Veshi tha se, rruga do të arnohet dhe se bashkia nuk ka fonde për shtrimin e saj me asfalt. Ai tha se nuk i mbështet qeveria, pasi edhe për projektet që ka bërë, nuk janë financuar.

Top Channel