I përzgjedhuri i Trumpit, Kavanaugh nuk zmbrapset nga akuzat

25/09/2018 09:46

Brett Kavanaugh, i përzgjedhuri i presidentit amerikan Donald Trump për gjykatës në Gjykatën Supreme, ka thënë se ai “nuk do të lejojë akuzat e rreme” që ta largojnë nga procesi i nominimit.

Duke folur për “Fox News”, Kavanaugh ka thënë se ai “nuk do të shkojë askund”, pavarësisht supozimeve për sjellje të pahijshme seksuale. Ai ka folur vetëm një ditë pasi një shoqe e klasës në Universitetin Yale, Deborah Ramirez ka thënë se ai ka pasur sjellje të keqe në një festë, teksa të dy kanë qenë të rinj.

Kavanaugh tanimë ka hedhur poshtë të gjitha akuzat kundër tij. Akuzuesja e parë, Christine Blaesy Ford do të dëshmojë para Komitetit Gjyqësor të Senatit të enjten, e pasuar nga dëshmia e Kavanaugh.

Emërimi i Kavanaugh në Gjykatën Supreme do të përbënte një fitore të madhe për administratën e Trumpit, pasi ky institucion do të mund të miratonte ligje në të mirë të konservatorëve në vitet e ardhshme.

Ai është paraqitur në “Fox News” së bashku me gruan e tij, Ashley, të hënën, ndërkohë që republikanët janë duke shtyrë përpara nominimin e tij. Kavanaugh ka thënë se “kurrë nuk ka ofenduar askënd seksualisht, në shkollë të mesme apo kudo”.

“Ne jemi duke kërkuar proces të drejtë, ku unë mund të mbroj integritetin tim dhe të dhënat afatgjata për promovimin e barazisë dhe dinjitetit për gratë, duke nisur me gruan që më ka njohur kur kam qenë 14 vjeç”, ka thënë ndër të tjera ai.

Top Channel