Asambleja politike e PPE miraton rezolutën: Drejtuesit e opozitës të izoluar në prag të fushatës 22/11 15:03
Afrimi i PDIU-së së Shpëtim Idrizit me koalicionin opozitar të drejtuar nga Lulzim Basha nuk është pëlqyer nga kryetari i PBDNJ-së, Vangjel Dule.
Burime nga kjo forcë politike bëjnë me dije se Dule, që përfaqëson edhe minoritetin grek, po mendon ndërprerjen e bashkëpunimit politik me Bashën.
Të njëjtat burime nga PBDNJ i thanë Top Channel se një gjë e tillë është diskutuar edhe në një mbledhje të Kryesisë së kësaj force politike, ditën e enjte, menjëherë pasi Basha i hapi dyert çamëve të PDIU-së që drejtohen nga Idrizi.
Gjithçka do të vendoset nga qasja që kryedemokrati Basha do të ketë ndaj Idrizit.
Një pritje e tij me krahë të hapura ka shumë gjasa që të largojë PBDNJ-në, njësoj siç ndodhi kur Rama – pasi erdhi në pushtet në vitin 2013 me Vangjel Dule aleat – afroi në koalicion Shpëtim Idrizin.
Atëherë kjo lëvizje solli reagimin e Dules që doli nga koalicioni i majtë duke iu bashkuar më pas Lulzim Bashës.
Lëvizjet e reja në skenën politike bënë që në zyrën e kryedemokratit të trokiste të premten vetë kreu i PBDNJ-së për të qartësuar pozicionet. Por për sa kohë aleanca e re PD-PDIU ende nuk është zyrtare, Dule u tregua evaziv në deklarata, duke ia lënë kohës një qëndrim përfundimtar.
“Flasim për një axhende politike aktuale, jo për hamendësime. PBDNJ është një parti që ka prioritetet e veta. Për aq kohë sa prioritetet e veta kryesore janë në afinitet me një forcë tjetër politike, natyrisht që vazhdon bashkëpunimi. Që nga momenti që nuk ekziston kjo bazë e realitetit të zhvillimeve politike, atëherë mungojnë premisat për një gjë të tillë”, u shpreh Dule.
Brenda kësaj jave kryedemokrati Basha pritet të mbyllë një takim edhe rivalin e Dules, Shpëtim Idrizin. Në rast se minoritarët largohen, opozita do të humbasë një deputet, ndërsa afrimi i çamëve të Idrizit nuk i sjell asnjë favor në sallën e Parlamentit.
Top Channel
