Tirana mbetet në dorë të Refik Halilit, Gjykata pezullon ankandin deri në shqyrtimin e çështjes në themel 24/04 12:50
Ndonëse në një nivel jo nga më të lartët, Kategoria Superiore mbetet padyshim një kampionat shumë i vështirë për protagonistët, e trajnerët në mënyrë të veçantë.
Dhjetë skuadrat e Superiores, të cilat zhvillojnë një kampionat me 4 faza për 36 javë, mesatarisht drejtohen nga dy trajnerë brenda vitit.
Plot 26 është numri i trajnerëve që janë ndërruar gjatë sezonit 2017-2018. Një shifër që më tepër sesa rekord mund të konsiderohet si një dukuri e hershme e presidentëve të klubeve tona, por edhe si mungesë e programeve afatgjata.
Pesë nga 10 skuadrat e Kategorisë Superiore; Partizani, Luftëtari, Teuta, Vllaznia, apo edhe Lushnja; kanë zhvilluar një sezon me nga 3 trajnerë. Mes tyre, ajo që bie në sy është skuadra gjirokastrite e Luftëtarit, e cila edhe pse arriti të kalojë çdo pritshmëri në letër duke u renditur në vendin e tretë dhe në zonën europiane, vendosi të largojë Hasan Likën, trajneri që i arriti këtë objektiv historik për ta.
Arsyet e vërteta nuk dihen, por të paktën e vërtetë është që nuk lidhen me arritjet sportive të ekipit. Një sezon të luhatshëm ka zhvilluar edhe Partizani, i cili pas projektit italian të Moggit dhe Julianos dështoi edhe me trajnerin e tyre që i ka zgjidhur gjithmonë këto probleme, si Sulejman Starova, ndërkohë që rezultatet e mira të Klevis Dalipit u zeruan nga mosarritja e objektivit, që ishte zona europiane.
Mungesa e fitimit të Kupës nga skuadra e Laçit me sa duket ishte një faktor i rëndësishëm për të ardhmen e Gentian Mezanit, trajnerit vlonjat që bëri një paraqitje të mirë me laçianët, që në këtë sezon u renditën në vendin e katërt dhe do të jenë pjesë e kupave të Europës, pasi Skënderbeu kampion në fuqi fitoi si kupën, ashtu dhe kampionatin.
Korçarët kanë të vetmen skuadër që e ka filluar dhe mbaruar sezonin e fundit me vetëm një trajner, Ilir Dajën, i cili ka rinovuar sërish me klubin e Skënderbeut, që mbetet ende në pritje të vendimit të Gjykatës së Arbitrazhit Sportiv të Lozanës, se çfarë do të ndodhë me pjesëmarrjen e tyre në kupat e Europës në këtë sezon.
26 trajnerë kanë drejtuar 10 skuadrat e Superiores në sezonin 2017-2018
Skënderbeu: Ilir Daja
Kukësi: Mladen Milinkoviç, Peter Pacult
Partizani: Mark Juliano, Sulejman Starova, Klevis Dalipi
Luftëtari: Luis Kurbejo, Daniel Fernandez, Hasan Lika
Laçi: Stavri Nica, Gentian Mezani
Flamurtari: Shpëtim Duro, Ardi Behari, Petraq Bifsha
Kamza: Ramadan Ndreu, Julian Ahmataj
Teuta: Gugash Magani, Stavri Nica, Gentian Begeja
Vllaznia: Armando Cungu, Ernest Gjoka, Ervis Kraja
Lushnja: Artan Bano, Hysen Dedja, Dritan Çuko, Ilir Gjyla
Top Channel
