DEA godet mafien shqiptare në Spanjë, sekuestohen një ton kokainë dhe 1.5 mln euro

Një ton kokainë dhe 1.55 milionë euro u sekuestruan gjatë goditjes së fortë të dhënë bandave mafioze shqiptare, të cilat lëviznin sasi të mëdha kokaine nga Kolumbia në rrugë ajrore, e për shpërndarjen e saj përdornin grupe kriminelësh spanjollë, njohës “të jetës së natës”.

Droga kalohej në valixhe të mëdha të zeza, nën maskimin e shërbimeve të një kompanie që merrej me transport. Pesë persona kanë përfunduar në pranga në vazhdën e aksionit, që pasoi një hetim të nisur në muajin nëntor.

Pas disa verifikimesh, agjentët ranë në gjurmët e organizatës kriminale të drejtuar nga shqiptarë që jetonin në Spanjë, e që kishin arritur të fusnin në vend sasi të mëdha kokaine nga Kolumbia përmes fluturimeve “Charter”.

Agjentët kishin mundur të zbulonin se krerët e grupit ishin zhvendosur në Spanjë me qëllimin të krijonin aty një pikë hyrëse të drogës në Europë. Hetuesit arritën madje të binin në gjurmët e një ngarkese lëndësh narkotike, e cila po ruhej në Madrid për t’u shpërndarë më vonë.

Pikërisht këtu vunë re se ajo ishte fshehur në valixhe të mëdha të zeza. Pas ndërhyrjes u arrit të sekuestroheshin 790 pako, që përmbanin një ton kokainë, dhe shumën marramendëse të parave, që mbaheshin në një valixhe si pagesë për transportin e drogës.

Operacioni kulmoi në Madrid me arrestimin e dy shqiptarëve, përgjegjësi kryesor dhe njeriu i tij i besuar, si dhe dy spanjollë të skeduar në polici, të cilët ishin ngarkuar me detyrën e logjistikës, mbledhjen dhe transportimin e drogës. Në pranga ka përfunduar edhe kreu i grupit, që furnizonte lëndën narkotike në Kolumbi.

Top Channel