Autostrada Tiranë-Durrës do një rindërtim nga e para, u shpreh ministri i Infrastrukturës dhe Energjisë Damian Gjiknuri, me një kosto rreth 20-30 milionë euro.
Gjatë konferencës për mediat, ku foli për tarifën e rrugës Durrës- Kukës, ai përmendi autostradën në fjalë si shembull i qartë degradimi.
“Shembull i qartë degradimi është rruga Tiranë- Durrës për shkak të mbipërdorimit, mosndërhyrjes në kohë dhe sot jemi në fazën që do gati një rindërtim nga e para. Ne kemi marrë masat të fillojmë këtë vit riveshjen e një shtrese të asfaltit por që ajo rrugë në terma afatgjatë të ketë qëndrueshmëri bëhet fjalë për vlera mbi 20-30 milionë euro minimalisht. Realisht kjo është çdo të thotë degradimi i një aseti dhe lënia pas dore. Vetëm për riveshjen do të harxhojmë me projektin e detajuar nga BB, janë 11 milionë euro që do ta mbajmë për disa vjet në parametra normale. Imagjino të bësh ndërhyrje në trupin e rrugës, një rrugë e ndërtuar keq që praktikisht ka degraduar”, tha Gjiknuri.
Ai tha më tej se “nevoja për mirëmbajtje prek dhe rrugë të reja për shkak të fenomeneve të paparashikuara”.
Top Channel
