Kukësi do t’i rikthehet objektivit kryesor të këtij sezoni, mbrojtjes së titullit kampion në Kategorinë Superiore. Por, të dielën në orën 13:00, në stadiumin “Zeqir Ymeri” do të ketë përballë Flamurtarin, forcë e dytë e kampionatit dhe skuadër e forcuar ndjeshëm në merkato, ashtu si verilindorët.
“Flamurtari për momentin ka një ecuri mjaft të mirë, është ekip i organizuar. Alla nuk do të luajë ditën e dielë dhe shpresoj mos ta humbim për shumë kohë. Ekipi duhet të jetë i bashkuar që mos t’i ndiejmë mungesat. Shpresoj të arrij fitoren e parë në Kukës. Në dy ndeshjet që kemi luajtur, ekipi është përgjigjur mirë, por kemi ende shumë punë. Nuk e njoh ende mirë Superioren, pasi kam qenë në vetëm një ndeshje, ndërsa në Kupë u përballëm me një ekip të konsoliduar, si Tirana. Koha do të tregojë sa i qëndrueshëm është ekipi. Duhet të përmirësohemi në qarkullimin e topit, por më pëlqen shumë gjendja fizike, që është optimale. Kemi një diferencë 9 pikë me Skënderbeun dhe kjo ndeshje nuk do të jetë përcaktuese”, tha Peter Pacult, trajner i Kukësit.
Ndaj Flamurtarit, Kukësi ka fituar gjithmonë në shtëpi. Nëse imponohet të dielën në fushën e tij, ekipi i Pacult do të barazojë Flamurtarin në renditjen e Superiores. Për të gjithë tifozët që do të duan të ndjekin ndeshjen në stadiumin e Kukësit, hyrja këtë fundjavë do të jetë falas.
Top Channel
