Zyrtari i OKB-së në Veriun komunist: Nevojë urgjente, kanalet e komunikimit

Lajmi bëhet i ditur nga vet organizmi ndërkombëtar, përmes një deklarate, pas vizitës në Penian të Jeffrey Feltman, një udhëtim i nivelit të lartë nga një zyrtar i OKB-së në vendin e izoluar komunist në 6 vitet e fudnit.

Koreja e Veriut njofton se ka rënë dakord për të ruajtur linja komunikimi të rregullta me Kombet e Bashkuara. Tensionet mbi programin e armatimeve të Veriut komunist janë rritur edhe më shumë, pas testimit më të fundit të raketës balistike gjatë javës së kaluar.

Veriu komunist thotë se, ajo ishte raketa më e avancuar deri më sot, e aftë të arrijë deri në territorin kontinental të Shteteve të Bashkuara.

Testimi ishte i fundit i një serie provash të raketave bërthamore dhe atyre balistike, të kryera në kundërshtim të hapur të sanksioneve të vendosura nga OKB.

Koreja e Jugut dhe Shtetet e Bashkuara kanë zhvilluar ndërkohë stërvitje ushtarake të shkallës së gjerë, si për të treguar forcën kundrejt vendit të izoluar.

Kombet e Bashkuara vazhdojnë të operojnë në Korenë e Veriut përmes programeve të ofrimit të ushqimeve, agrikulturës, si dhe ndihmave shëndetësore, por vizita e fundit e një zyrtari të lartë daton larg, në vitin 2011.

Pasi Feltman u takua me zyrtarë të lartë koreano-veriorë, “të gjitha palët ranë dakord se situata aktuale ishte më e tensionuara dhe më e rrezikshmja, sa i përket paqes dhe sigurisë në botën e sotme”, thuhet në deklaratë.

“Duke theksuar nevojën urgjente për të parandaluar llogaritë e gabuara dhe për të mbajtur hapur kanalet e komunikimit për të reduktuar rreziqet e një konflikti, Feltman ka nënvizuar se komuniteti ndërkombëtar, i alarmuar nga përshkallëzimi i tensioneve, është i angazhuar për të arritur një zgjidhje paqësore”, vijon më tej komunikata.

Media shtetërore e Koresë së Veriut kishte thënë më herët se, tensionet aktuale “i atribuohen tërësisht politikës armiqësore të Shteteve të Bashkuara”.

Top Channel