Vitin e ardhshëm Shqipëria do të shtojë me 60% numrin e trupave në Afganistan. Mes trupave të reja që do të dislokohen do të jete edhe një kontingjent i Forcave Speciale.
Lajmin e dha ministrja e Mbrojtjes gjate një vizite një ditore në Kabul. Xhaçka vizitoi komandën qëndrore të NATO-s dhe Aeroportin ndërkombëtar “Hamid Karzai”, ku kryen misionin kontingjenti i 6-të.
“Ne të gjithë ju jemi mirënjohës për kontributin që jepni dhe përfaqësimin dinjitoz tuajin përkrah vendeve të tjera aleate të NATO-s u tha ministrja komandove shqiptare.
Në një videokonferencë nga Tirana që u transmetua në kanalin qeveritar në Facebook ERTV, edhe kryeministri Rama deklaroi se ndonëse nuk është bërë gjithçka që efektivët shqiptarë në misionet jashtë vendit meritojnë, vëmendja e qeverisë për ta është maksimale.
Në Afganistan shërben një kontigjent prej 83 trupash të dislokuar në Kabul, Herat dhe Mazar e-Sharif. Me shtimin e trupave vitin e ardhshëm, kontributi i Shqipërisë pritet të përqëndrohet në “Force Protection”, në rol këshillimi dhe asistencë në Komandën e Perëndimit në Herat.
Gjatë qendrimit në Afganistan, Ministrja takoi Komandantin e Misionit të NATO-s Resolute Support, gjeneralin John Nicholson i cili sipas njoftimit nga kjo ministri ka përgëzuar Xhaçkën për cilësinë e përgatitjes së oficerëve shqiptarë që siç tha ai, janë ndër më të mirët.
Top Channel
