Mbështetës të pakënaqur të presidentit Donald Trump kanë nisur një fushatë nëpër mediet sociale, duke postuar video të vet atyre duke djegur kapelet e fushatës së kreut të Shtëpisë së Bardhë, ku shkruhej “Make America Great Again”.
Fushata e të pakënaqurve vjen pas lajmit se presidenti po punonte së bashku me demokratët drejt arritjes së një marrëveshjeje për të mbrojtur të rinjtë emigrantë pa dokumente në Shtetet e Bashkuara.
Shumica e elementëve të linjës së ashpër që mbështesnin atë, e kanë kritikuar Trumpin për këtë lëvizje të fundit. Përgjatë fushatës zgjedhore, ai kishte premtuar se “do t’i jepte fund menjëherë urdhrit ekzekutiv të paligjshëm”, i njohur si “DACA”.
“Shtyrja e Veprimit ndaj Emigrantëve Fëmijë”, siç njihet programi “DACA” ishte vendosur për të mbrojtur të ashtuquajturit “ëndërrimtarë”, – apo emigrantët që ishin futur në mënyrë ilegale në SHBA si fëmijë, të pashoqëruar nga prindërit e tyre, – nga deportimi.
Rreth 800 mijë emigrantë të rinj pa dokumente besohet të kenë hyrë në SHBA, por ata janë lënë në mëshirë të fatit, pasi presidenti Trump shpalli fillimisht anulimin e skemës, e më pas u duk se u tërhoq nga vendimi i tij, duke nisur negociatat me rivalët.
Fushata e Trumpit u udhëhoq nga një qëndrim i ashpër ndaj emigracionit. Ajo përfshin gjithashtu premtimin për të ndërtuar një mur në kufirin e SHBA-ve me Meksikën, që do të paguhej nga qeveria meksikane.
“Breitbart”, media informative e ekstremit të djathtë e udhëhequr nga ish-kryestrategu Steven Bannon, akuzoi presidentin për një “status të plotë” sa i përket amnistisë ndaj afro 800 mijë “alienëve ilegalë”.
Faqja në fjalë e internetit e përshkroi atë si “Don amnistia”, e menjëherë u krijua një hashtag nga disa prej mbështetësve që postuan videot e tyre duke djegur kapelet “Maga”, e duke kritikuar negociatat. Pati edhe nga ata përdorues të rrjeteve sociale që thonë se votuesit e Trumpit duhej ta kritikonin në njëfarë mënyre atë.
Top Channel