Rafael Nadal dhe Roger Federer kualifikohen për në çerekfinale të US Open. Tenisti spanjoll kaloi në raundin e katërt në Flushing Meadows Alexander Dolgopolov, duke u kthyer në fazën çerekfinale të këtij eventi për herë të parë në 4 vitet e fundit.
Nadal e dominoi totalisht sfidën me ukrainasin të cilën e mbylli me rezultatin 3-0 me sete 6-2;6-4;6-1 duke rritur pretendimet e tij për fitoren përfundimtare të US Open.
Në çerekfinale Nadal do të përballet me Andrey Rublev, me adoleshentin rus që iu imponua belgut Goffin duke e mposhtur 3-0 me sete 7-5;7-6; 6-3. Rublev me këtë sukses u bë tenisti më i ri që arrin në çerekfinale të US Open pas Andy Roddick në vitin 2001.
Ndërsa Federer siguroi vendin mes 8 më të mirëve në turneun amerikan pasi mposhti gjermanin Philip Kohlschreiber me rezultatin 3-0. Zvicerani, që në New York kërkon titullin e tij të 20 Grand Slam në karrierë, shpenzoi vetëm 1 orë e 49 minuta për të fituar këtë përballje duke i mbyllur setet me rezultatin 6-4; 6-2; 7-5.
Në çerekfinale, Federer do të përballet me Juan Martin Del Potron. Argjentinasi eliminoi në 1/8 e finaleve Dominic Thiem në një ndeshje vërtet dramatike dhe të gjatë. Del Potro në këtë ndeshje e pa veten në dizavantazhin 2-0 me sete me Thiem që i fitoi ata 6-1;6-2, por ai reagoi dhe e ktheu gjithçka në favorin e tij duke fituar 3 setet e tjerë 6-1;7-6;6-4 dhe krejt ndeshjen 3-2.
Top Channel
