Me një reagim në rrjetet sociale, kryetari i PD, Lulzim Basha ka ironizuar deklaratën e kryeministrit Rama për të luftuar elementët kriminalë në vend.
“Me seriozitetin tragjiko-komik që e ka pushtuar, Edi Rama shpalli sot para botës një tjetër betejë historike: luftën heroike kundër kanabisit dhe grupeve kriminale të lidhura me drogën. Por, tashmë, dihet se herozimi i vetëm i Ramës është të arrestojë keqbërësit e vegjël, ata që nuk janë aq të mëdhenj sa të kenë lidhje me pushtetin”, ka thënë Basha.
Sipas tij, koka e kthimit të Shqipërisë në plantacion kanabisi është Sajmir Tahiri, aq sa edhe partnerët e huaj i vunë ultimatum Ramës për largimin e tij.
“Por ata që presin që aksioni i Ramës të prekë Tahirin do të zhgënjehen. Trafikanti ndoshta më i madh i drogës në Shqipëri është Klement Balili, të cilin e Edi Rama e la të lirë edhe pse e kërkonte qeveria e SHBA-ve, sepse po të fliste Balili rrëzohej gjysma e ministrave. Prandaj, ata që presin që me aksionin e tij Rama të arrestojë Balilin do të zhgënjehen”, ka thënë Basha.
Sipas tij, një tjetër trafikant droge, ndër më të kërkuarit në Evropë është vëllai i Fatmir Xhafës. Por, shton kreu i PD, edhe në këtë rast ata që presin që aksioni i Ramës ta arrestojë atë do të zhgënjehen.
“Aksioni i Edi Ramës do të arrestojë ca fshatarë të varfër dhe ca kriminelë të vegjël. Kriminelët e vërtetë do të qeverisin vendin së bashku me Ramën, derisa populli t’i largojë”, ka shtuar Basha.
Top Channel
