Edi Rama i ka gati prioritetet për 100 ditët e para të punës dhe pavarësisht rezultateve pozitive të prezantuara edhe gjatë mbledhjes së Task Forcës për situatën e kanabisit në vend, kreu i qeverisë thotë se në 3 muajt e parë qeverisë së tij të re do t’i japë fund historisë së shëmtuar të kultivimit masiv dhe të paligjshëm të kanabisit në Shqipëri, duke e mbyllur luftën e këtij viti me fitoren e pakontestueshme të Policisë së Shtetit.
Dhe ashtu siç ka premtuar që në fushatë, se vendin do ta qeverisë bashkë me njerëzit e zakonshëm, edhe për këto prioritete ka vendosur të pyesë qytetarët duke pranuar se një pjesë e këtyre operacioneve shkojnë përtej afatit të 100 ditëve.
Rama fton qytetarët që të bëhen pjesë e platformës online për të nisur luftën kundër atyre që pas fitores i ka quajtur “parazitë e grabitqarë në çdo zyrë shteti”. E ashtu siç e ka treguar ditët e fundit, prioritet i qeverisë do të jetë llogaridhënia e drejtuesve të agjencive apo inspektoriateve.
Lufta kundër shpërdorimit të ujit të pijshëm tashmë ka nisur, por shihet sërish si prioritet për të ndëshkuar abuzuesit.
Informaliteti në biznes, mjedisi, siguria ushqimore dhe siguria rrugore janë gjithashtu prioritete, për të cilat kreu i qeverisë kërkon bashkëpunimin e qytetarëve.
Kryeministri zbulon gjithashtu se nga shtatori do të ketë sërish dëgjesa publike, këtë herë për buxhetin e vitit 2018 si mënyrën më të mirë për të riorganizuar administratën shtetërore dhe projektet për vitin 2018.
Statusi i plotë i kryeministrit Rama
“Si i mendoni 100 ditet e para? Do t’i isha mirënjohës secilit dhe secilës prej jush që do të jepte opinionin e vet, mbi disa ide për operacionet që po përgatiten për 100 ditët para të qeverisë së re, si më poshtë:
1. Hapen regjistrimet e anëtarëve të koalicionit të madh për Shqipërinë që duam, në Platformën online të Bashkëqeverisjes me njerëzit e zakonshëm të këtij vendi dhe nis lufta e gjithanshme, kundër parazitëve e grabitqarëve në çdo zyrë të shtetit.
2. Nis procesi i llogaridhënies të gjithë drejtuesve të agjencive, inspektoriateve, drejtorive e zyrave të shtetit, në takime publike dhe në prani të anëtarëve të qeverisë së re e të skuadrave të deputetëve të çdo qarku.
3. Fillon lufta kundër shpërdorimit të ujit pijshëm, prerja e lidhjeve të paligjshme, prishja e lavazheve pa leje dhe ndëshkimi i abuzuesve me këtë pasuri të çmuar kombëtare.
4. Çelet faza e re e luftës kundër informalitetit në biznes me përshkallëzimin e fuqishëm të presionit ligjor, mbi çdo subjekt të madh e të vogël që nuk operon përmes kuponit tatimor.
5. Nis pastrimi rrënjësor i akseve kombëtare nga plehrat, mallrat, tregjet, varrezat e makinave, ferrat, etj., si edhe fillon mbyllja hyrjeve të paligjshme apo të rrezikshme në rrugën kryesore.
6. Shpallet një luftë si asnjëherë tjetër kundër ndotjes së mjedisit, hedhjes së mbeturinave jashtë vendeve të përcaktuara dhe organizohet e zhvillohet një aksion kombëtar pastrimi në çdo qytet, fshat e metër katror të Shqipërisë.
7. Fillon beteja e gjatë për sigurinë ushqimore në bashkëpunim të ngushtë me qytetarët e angazhuar për Shqipërinë që duam, për të vënë përpara përgjegjësisë çdo strukturë shtetërore, kompani furnizimi apo subjekt tregtar, që cënon sigurinë e konsumatorit.
8. Hapet fushata e re e sigurisë rrugore për rritjen e ndërgjegjësimit të drejtuesve të automjeteve dhe uljen e mëtejshme të numrit të aksidenteve në rrugë.
9. Organizohen në çdo qark dëgjesat publike për buxhetin e vitit 2018, si edhe për riorganizimin e administratës shtetërore, shërbimeve ndaj publikut në çdo bashki dhe projektet e vitit në vijim në rang vendi e qarku.
10. Mbyllet me fitoren e pakontestueshme të Policisë së Shtetit lufta e këtij viti dhe shpallet fundi i historisë së shëmtuar të kultivimit masiv dhe të paligjshëm të kanabisit në Shqipëri.
“Siç kuptohet një pjesë e këtyre operacioneve, shkojnë përtej kufirit të 100 ditëve, por më duket se nisja që ditën e parë të mandatit të ri është kusht për suksesin e tyre. Si mendoni? Çdo kritikë për çka mund të jetë e tepërt apo mund të mungojë në këtë grumbull idesh paraprake është e mirëpritur”, ka thënë Rama.
Top Channel
