Kriza me Katarin, FIFA zëvendëson arbitrin në futboll

Bëhet fjalë për arbitrin që duhej të gjykonte ndeshjen mes Tajlandës dhe Emirateve të Bashkuara Arabe, e vlefshme për grupin B të zonës kualifikueseve aziatike të Botërorit 2018.

FIFA kishte përcaktuar një gjyqtar nga Katari për këtë sfidë, por më pas qeveria e futbollit e zëvendësoi atë me kërkesë të Federatës së Futbollit të Emirateve të Bashkuara Arabe, duke caktuar një arbitër nga Singapori, i ndihmuar nga dy asistentë nga Malajzia.

Edhe pse FIFA shprehet qartë kundër ndërhyrjeve të politikës në futboll, këtë radhë ajo bëri një përjashtim.

“Vendimi u mor për arsye sportive, duke u bazuar edhe në situatën aktuale gjeopolitike”, lexohet në komunikatën e FIFA-s. Por shqetësimet për qeverinë e futbollit botëror nuk ndalen këtu. Botërori i vitit 2022, i parashikuar të zhvillohet në Katar është vërtet në rrezik, megjithatë Gianni Infantino është shprehur optimist për zgjidhjen e kësaj krize.

“Jam në kontakte të vazhdueshme me autoritetet më të larta të Katarit”, tha Infantino në një intervistë për median franceze. “Duhen edhe 5 vite deri në Botërorin e vitit 2022, e unë besoj se kjo do të jetë një kohë e mjaftueshme për të normalizuar gjendjen. Nëse futbolli është në gjendje që të japë një kontribut sado të vogël, që kjo të ndodhë, jam gati të ofroj ndihmën time”, shtoi presidenti i FIFA-s.

Top Channel